Հյուսիսային համալսարանի ռեկտորը ընդդիմադիր ակտիվիստներին դուրս է հանել բուհից

Մի քանի օր Երևանում անկանոն գործողություններ իրականացնող ընդդիմադիրները քիչ առաջ մուտք են գործել Երևանի հյուսիսային համալսարան՝ Արցախի դրոշը այնտեղ տեղադրելու նպատակով:

Վերջիններիս, սակայն, համալսարանի ռեկտոր Մհեր Մակիչյանը շենքից դուրս է հանել: Ի պատասխան ցուցարարների ամոթանքի վանկարկումների՝ ռեկտորը հայտարարել է, որ  համալսարանում դրոշ կախելով՝ որևէ հարց չի լուծվելու: «Իրազեկման ակցիաները դրսում են կազմակերպվում, թե չէ ենթարկվելու եք պատասխանատվության»,- հավելել է նա:

Ռեկտորը նաև նկատել է՝ Հյուսիսային համալսարանը մասնավոր սեփականություն է, որի տարածքում արգելվում են նմանատիպ ակցիաներ իրականացնելը: «Ավելի բարի նպատակներով մարդիկ էլ չեն կարող ներս մտնել և ուզել անել: Ձեր ցանկացած քայլը, ինչքան էլ ազգանվեր լինի, մենք համաձայն չենք: Այդ քայլը մենք գտնում ենք ոչ նպատակահարմար, մենք որևէ կերպ հիմնավոր չենք համարում այս ակցիան»:

Հյուսիսային համալսարանի ռեկտորը նաև նկատել է՝ ակտիվիստները չպետք է իրենց մտածելակերպը փորձեն տարածել համալսարանի ներսում, քանի որ իրենց համալսարանը ավելի առաջադեմ մտածելակերպ ունի:

Ցուցարարները, ի պատասխան, հայտարարել են, որ սադրելու են և չեն հեռանալու համալսարանի տարածքից՝ մինչև չտեղադրեն Արցախի դրոշը: