Պետական եկամուտների կոմիտեն (ՊԵԿ) տեղեկացնում է, որ փետրվարի 22-ին քրեական գործ է հարուցվել «Սանիթեք ինթերնեյշնլ» ՍՊ ընկերության և «Սանիթեք» ՍՊԸ հայաստանյան մասնաճյուղի վերաբերյալ նախապատրաստված նյութերով՝ առանձնապես խոշոր չափերով հարկերը չվճարելու դեպքի առթիվ։
Քրեական գործով որպես մեղադրյալ ներգրավված անձինք չկան:
«Քրեական գործի նախաքննության ընթացքում «Սանիթեք» ՍՊԸ Հայաստանյան մասնաճյուղի և «Սանիթեք ինթերնեյշնլ» ՍՊ ընկերության կողմից կատարված իրավախախտումներն արձանագրելու, լրացուցիչ գանձման ենթակա հարկային պարտավորությունների վերջնական չափը պարզելու, մասնագիտական ստուգման ակտերով առաջադրելու, ինչպես նաև ընկերության ծավալած փաստացի գործունեության համապատասխանությունն օրենքներին և այլ իրավական ակտերի պահանջներին պարզելու համար նշանակվել են համալիր հարկային ստուգումներ, որոնք դեռևս ընթացքի մեջ են», – ասված է հաղորդագրությունում։
Քրեական գործի նախաքննությունը շարունակվում է:
Հիշեցնենք, որ Երևանի աղբահանությամբ զբաղվող «Սանիթեք» ընկերությունը վաղը նախատեսում էր ասուլիս անցկացնել Վրաստանի մայրաքաղաքում, սակայն արդեն կեսօրից հետո ընկերությունը հաղորդագրություն տարածեց ասուլիսը Երևանում անցկացնելու վերաբերյալ։
Հայտարարության մեջ մասնավորապես ասվում է. – «Որպեսզի հնարավոր լինի խուսափել ընկերության դեմ նոր քարոզարշավի թեմայի ստեղծումից և չկորցնել հիմնական նպատակը, ընկերության մամուլի ասուլիսը, ընկերության ներկայացուցիչների մասնակցությամբ, տեղի կունենա ուրբաթ օրը` ս.թ. օգոստոսի 2-ին, ժամը 12:00֊ին, «Արմենիա Մարիոթ» հյուրանցի «Տրդատ թագավոր» սրահում»։
