ՄԱԿ-ը զեկույց է հրապարակել ուկրաինական պատերազմում մարդու իրավունքների խախտումների վերաբերյալ

ՄԱԿ-ի Մարդու իրավունքների գրասենյակի դիտորդական առաքելությունը հունիսի 29-ին զեկույց է հրապարակել ուկրաինական պատերազմի ժամանակ մարդու իրավունքների խախտումների վերաբերյալ։

Զեկույցն արտացոլում է 2022 թվականի փետրվարի 24-ից մայիսի 15-ը հավաքագրված տվյալները։

Այս ընթացքում, մասնավորապես, դիտորդական առաքելության անդամները տվյալներ են ստացել ավելի քան 300 խաղաղ բնակիչների սպանությունների մասին, որոնք ենթադրաբար կատարել են ռուս զինվորականները՝ ռազմական գործողություններից դուրս։ Խոսքը վերաբերում է նաև քաղաքացիական մեքենաներին կրակահերթի ենթարկելուն , որոնք փորձում էին փախչել, ինչպես նաև այն մարդկանց սպանությունների մասին, որոնց ռուսները կասկածում էին Ուկրաինայի զինված ուժերի համար աշխատելու մեջ։ Սպանությունների մի մասը կատարվել է, ըստ երևույթին, կամայականորեն։

ՄԱԿ-ը նաև տեղեկատվություն է ստացել սեռական բռնության 108 հնարավոր դեպքերի մասին (այդ թվում՝ 78 բռնաբարություն): Առաքելությունը կարողացել է հաստատել 23 դեպք, այդ թվում՝ խմբակային բռնաբարություն, խոշտանգումներ, հարկադիր մերկացում հանրության առաջ և սեռական բռնության սպառնալիքներ։ 13 դեպքով տուժողները եղել են տղամարդիկ, ինը կին, մեկը՝ աղջիկ։

Դեպքերի մեծ մասը կատարվել է Ռուսաստանի Դաշնության զինված ուժերի կողմից վերահսկվող տարածքներում, սակայն դեպքեր եղել են նաև [ուկրաինական] կառավարության կողմից վերահսկվող տարածքներում։

Զեկույցում խոսվում է նաև երկու պատերազմող կողմերի կողմից ռազմագերիների հետ վարվելու կանոնների խախտումների մասին։ ՄԱԿ-ը փաստագրել է արտադատական ​​մահապատիժների, խոշտանգումների, վատ վերաբերմունքի և բժշկական օգնությունից հրաժարվելու դեպքեր:

Աղբյուրը՝ Meduza.io

Թարգմանեց՝ Աստղ Խաչատրյանը