Վերաքննիչ քրեական դատարանը նոր նախագահ ունի

ՀՀ վերաքննիչ քրեական դատարանի նախագահ է ընտրվել Մխիթար Պապոյանը։ Տեղեկությունը հրապարակվել է ՀՀ դատավորների միության կայքում։ Պապոյանին այդ պաշտոնում ընտրել է Բարձրագույն դատական խորհուրդը։

Ստորև ներկայացնում ենք նրա կենսագրությունը:

Մխիթար Պապոյանը ծնվել է 1977 թվականին Արմավիր քաղաքում:
2000–ականների սկզբին աշխատել է ՀՀ արտաքին գործերի նախարարության իրավաբանական վարչությունում: 2006 թվականի հուլիս–սեպտեմբերին աշխատել է ՀՀ վճռաբեկ դատարանի աշխատակազմի իրավական փորձաքննությունների վարչությունում որպես ավագ մասնագետ:

Եղել է նաև ՀՀ դատական դեպարտամենտի կենտրոնական մարմնի կազմակերպական վարչության պետ, Երևանի քրեական դատարանի դատավորի օգնական։

Աշխատել է Երևան քաղաքի Աջափնյակ և Դավթաշեն վարչական շրջանների ընդհանուր իրավասության առաջին ատյանի դատարանի դատավորի օգնական։ Դատավոր է եղել Երևան քաղաքի Արաբկիր, Քանաքեռ-Զեյթուն, Կենտրոն և Նորք-Մարաշ վարչական շրջանների, ինչպես նաև Կոտայքի մարզի ընդհանուր իրավասության դատարաններում։

2015 թվականի փետրվարի 5-ին ՀՀ նախագահի հրամանագրով նշանակվել է ՀՀ Վերաքննիչ քրեական դատարանի դատավոր:
2018 թվականի հուլիսի 27-ին ՀՀ դատավորների ընդհանուր ժողովը նրան ընդգրկել է Կարգապահական հարցերի հանձնաժողովի կազմում: