Բայդենը Պուտինին մեղադրել է ուկրաինական տարածքները բռնակցելու փորձի մեջ

ԱՄՆ նախագահ Ջո Բայդենը Ռուսաստանին բացահայտ մեղադրել է Ուկրաինայի դեմ չհայտարարված պատերազմ սկսելու և ֆիկտիվ հանրաքվե կազմակերպելու համար՝ նշելով, որ, այդպիսով, Պուտինը փորձում է ուկրաինական տարածքի մի մասը բռնակցել։

Ամերիկացի առաջնորդի հայտարարություններն արվել են ՄԱԿ-ի Գլխավոր ասամբլեայի ամբիոնից, հայտնում է Euronews-ը:

«ՄԱԿ-ի Անվտանգության խորհրդի մշտական անդամը ներխուժել է հարևան երկիր՝ փորձելով ջնջել ինքնիշխան պետությունն աշխարհի քարտեզից: Ռուսաստանը անամոթաբար խախտել է ՄԱԿ-ի կանոնադրության հիմնական դրույթները: Այլևս ոչինչ չկա կարևոր, քան երկրների կողմից իրենց հարևանի տարածքը բռնի ուժով զավթելու հստակ արգելքը»,- ասել է նա:

Բայդենն առաջարկել է խոր բարեփոխել ՄԱԿ-ը՝ սկսած ՄԱԿ-ի Անվտանգության խորհրդի կազմից:

«ՄԱԿ-ի Անվտանգության խորհրդի անդամները, ներառյալ՝ Միացյալ Նահանգները, պետք է հետևողականորեն պահպանեն և պաշտպանեն ՄԱԿ-ի կանոնադրությունը և ձեռնպահ մնան վետոյի իրավունքի օգտագործումից, բացառությամբ՝ հազվադեպ արտակարգ իրավիճակների, որպեսզի Խորհուրդը մնա վստահելի և արդյունավետ: Այդ իսկ պատճառով Միացյալ Նահանգները աջակցում է Խորհրդի մշտական և ոչ մշտական ներկայացուցիչների թվի ավելացմանը»:

Բայդենն անպատասխանատու է անվանել միջուկային զենք կիրառելու վերաբերյալ՝ Մոսկվայի սպառնալիքները և հիշեցրել, որ միջուկային պատերազմը հնարավոր չէ հաղթել, և երբեք այն չի կարելի վարել:

Ավելի վաղ ՄԱԿ-ի գլխավոր քարտուղար Անտոնիո Գուտերեշը, բացելով 77-րդ նստաշրջանը, ասել էր, որ այժմ մոլորակի շատ մարդկանց ուշադրությունը բևեռված է Ուկրաինա՝ ռուսական ներխուժման վրա։

«Այս պատերազմը հանգեցրել է համատարած ավերածությունների, մարդու իրավունքների և միջազգային մարդասիրական իրավունքի զանգվածային խախտումների։ Հազարավոր մարդիկ զոհվել են մարտերի պատճառով։ Միլիոնավոր մարդիկ ստիպված են եղել լքել իրենց տները։ Ներխուժման հետևանքները ազդել են միլիարդավոր մարդկանց վրա ամբողջ աշխարհում»,- ասել է ՄԱԿ-ի գլխավոր քարտուղարը։