Իժևսկի դպրոցում կրակոցների հետևանքով սպանվել է 9 հոգի, նրանցից 5-ը երեխաներ են

Իժեւսկի թիվ 88 դպրոցում տեղի ունեցած հրաձգության հետեւանքով զոհվել է ինը մարդ, այդ թվում՝ հինգ երեխա։ Այս մասին երկուշաբթի ՏԱՍՍ-ին հայտնել են ՌԴ Քննչական կոմիտեի մամուլի ծառայությունից։

«Նախնական տվյալներով՝ հանցագործության զոհ է դարձել ինը մարդ, այդ թվում՝ ուսումնական հաստատության երկու անվտանգության աշխատակից և երկու ուսուցիչ, ինչպես նաև հինգ երեխա, կան վիրավորներ ևս», – նշել են Քննչական կոմիտեից։

Գերատեսչությունից հավելել են, որ զոհերի և վիրավորների մասին տեղեկությունները դեռ ճշտվում են։

Ավելի վաղ Ուդմուրտիայի ՆԳՆ մամուլի ծառայությունը հայտնել էր վեց զոհի և 20 վիրավորի մասին։ Գերատեսչությունից հայտնել են նաև, որ կրակած տղամարդու դին հայտնաբերվել է դպրոցի տարածքում, նա ինքնասպան է եղել։

«Ոստիկանները հայտնաբերել են կրակ բացած տղամարդու դին, ըստ տեղեկությունների՝ նա ինքնասպանություն է գործել»,- հայտնել են մամուլի ծառայությունից։

Ավելի վաղ հայտնել էինք, որ կրակոցները սկսվել են դասի ժամանակ, երբ սև կոստյումով անհայտ տղամարդը ներխուժել է դասարան ու կրակ բացել երեխաների վրա։