Հնդկական մամուլի հրապարակումները, ՀՀ-ի կողմից չեն հերքվել, լրացուցիչ բան ասել չեմ կարող. վարչապետ

«Հրապարակումները, որոնք եղել են հնդկական մամուլում, Հայաստանի Հանրապետության կողմից չեն հերքվել, որևէ լրացուցիչ բան այս պահին չեմ կարող ասել»:

Այս մասին Հանրային հեռուստաընկերության եթերում իր հարցազրույցում հայտարարեց ՀՀ վարչապետ Նիկոլ Փաշինյանը՝ պատասխանելով Հնդկաստանից զենք գնելու մասին շրջանառվող տեղեկություններին և հնդկական մամուլում այս մասին հրապարակված լուրերին:

«Սպառազինության և ռազմական տեխնիկայի գնման թեման այն թեման չէ, որը ես կուզենայի հրապարակային քննարկել, բայց պիտի ասեմ, որ այդ հրապարակումները, որոնք եղել են հնդկական մամուլում, Հայաստանի Հանրապետության կողմից չեն հերքվել, և որևէ լրացուցիչ բան այս պահին չեմ կարող ասել, չեմ էլ ուզենա ասել»,- նշեց վարչապետը: 

Նա հավելեց, որ իրենք ակտիվ քայլեր են ձեռնարկում ռազմատեխնիկական ոլորտում Հայաստանի համագործակցության շրջանակն ընդլայնելու համար։

«Մենք այդ ուղղությամբ շատ ակտիվ և ինտենսիվ քայլեր ենք ձեռնարկում։ Դա հեշտ գործ չէ»,- մանրամասնեց Փաշինյանը։

Հիշեցնենք՝ հնդկական The Economic Times պարբերականը երեկ հոդված էր հրապարակել այն մասին, որ Հնդկաստանը շուրջ 250 մլն դոլար արժեքով հրթիռների, համազարկային կրակի ռեակտիվ համակարգերի և այլ զինամթերքի զգալի քանակի մատակարարման պայմանագրեր է ստորագրել Հայաստանի հետ:

Նշվում էր, որ երկու երկրների կառավարությունների միջև սեպտեմբերի սկզբից համապատասխան պայմանագրեր են ստորագրվել։