Ակնհայտ է, որ տարածաշրջանում բալանսը փոխվում է. ԱՄՆ կոնգրեսական

ԱՄՆ Ներկայացուցիչների պալատի Ժողովրդավարական գործընկերության հանձնախմբի նախագահ Դեյվիդ Փրայսին անդրադարձել է տարածաշրջանային իրադարձություններին։ Նրա խոսքով.

«Այժմ տարածաշրջանում ուժերի հավասարակշռությունը փոփոխվել է, անվտանգային տիրույթում ևս կարող են փոփոխություններ լինել։ Ակնհայտ է, որ տարածաշրջանում բալանսը փոխվում է՝ հաշվի առնելով Ռուսաստանի հետ կապված իրադարձությունները։ Միգուցե որոշ ուժեր այլևս այդքան արմատական չեն, որքան եղել են, և, վստահաբար, կլինեն փոփոխություններ։

Այս պահին քննարկումներ են տեղի ունենում և՛ մեր բարեկամների միջև, և՛ նրանց հետ՝ մասնավորապես այն մասով, թե ինչ հարաբերություններ կզարգանան՝ ներառյալ անվտանգային տիրույթում։ Կարող եմ ասել, որ այսդ քննարկումները բավականին ինտենսիվ են»։

Նա պահանջել է, որ Ադրբեջանը դուրս բերի զորքերը ՀՀ տարածքից. «Մենք դեմ ենք ներխուժմանը, որը տեղի է ունեցել Հայաստանի ինքնիշխան տարածք, և պահանջում ենք, որ Ադրբեջանը վերադառնա ելման դիրքեր»:

ԱԺ արտաքին հարաբերություների մշտական հանձնաժողովի նախագահ Էդուարդ Աղաջանյանն էլ ասել է, թե անկյունաքարային կարևորության խնդիրն այս պահին Հայաստանի շուրջ տեղի ունեցող անվտանգային խնդիրներն ու մարտահրավերներն են։ Նրա խոսքով, այս հարցերի վերաբերյալ բավականին բովանդակային և կարևոր խոսակցություն են ունեցել ամերիկացի գործընկերների հետ

Ըստ Էդուարդ Աղաջանյանի. «Մեր գործընկերների այցը պետք է դիտարկել որպես վերջին շրջանում հայ-ամերիկյան հարաբերությունների դինամիկ զարգացման հերթական փուլ»։