Հակակոռուպցիոն կոմիտեն կունենա դեպոզիտ հաշվեհամար

ԱԺ-ն երկրորդ ընթերցմամբ քննարկեց Հակակոռուպցիոն կոմիտեի մասին ՀՀ օրենքում փոփոխությունների նախագիծը։

ՀՀ արդարադատության նախարարի տեղակալ Արփինե Սարգսյանը մանրամասնեց, որ Հակակոռուպցիոն կոմիտեի նախագահի տեղակալներին նշանակում է վարչապետը, սակայն օրենքում անհստակություն կար. 

«Եթե տեղակալները հրաժարականի դիմում են ներկայացնում, այն ուղարկում են կառավարություն՝ կառավարության հաստատումն ունենալու նպատակով։ Բայց հաշվի առնելով այն հանգամանքը, որ թե նշանակման, թե ազատման լիազորությունը վերապահված է վարչապետին, այստեղ կար որոշակի անհստակություն, ըստ այդմ՝ նախագիծը միտված այդ անհստակությունը շտկելուն»։

Փոխնախարարը նաև նշեց, որ նախագծով առաջարկվում է Հակակոռուպցիոն հանձնաժողովի համար սահմանել գանձապետարանում դեպոզիտ հաշիվ ունենալու իրավունք. 

«Հակակոռուպցիոն կոմիտեն կարող է ունենալ Հայաստանի Հանրապետության ֆինանսների նախարարության գանձապետարանում դեպոզիտ հաշիվ, որում կուտակվող միջոցները տնօրինվում են Հակակոռուպցիոն կոմիտեի գլխավոր քարտուղարի կողմից»: