2023 թվականի հունվարի 27-ին՝ կոմպոզիտոր Տիգրան Մանսուրյանի ծննդյան օրը, Երեւանում կկայանա համերգ, որի ընթացքում կներկայացվեն նրա՝ Հայաստանում երբևէ չհնչած ստեղծագործությունները:
Այս մասին այսօր հրավիրված մամուլի ասուլիսի ժամանակ հայտնեց Տիգրան Մանսուրյանը: Նրա խոսքով՝ տպավորիչ համերգ է սպասվում:
«Հիմնականում ներկայացնելու եմ գործեր, որոնք երբեւէ չեն հնչել Հայաստանում, կլինեն նաեւ ստեղծագործություններ, որոնք առհասարակ որեւէ տեղ երբևէ դեռ չեն կատարվել: Այդ երեկո կլինեն հայրեններ՝ նախատեսված երգչախմբի համար:
Ծրագրում նախատեսված է ընդգրկել օրհներգեր, որոնք վերջերս են հնչել Չեխիայում, իսկ Հայաստանում դեռ չեն ներկայացվել: Կհնչեն ժողովրդական աղոթքներ: Հնարավոր է՝ ծրագրում ընդգրկվի Ներսես Շնորհալու «Հավատով խոստովանիմ» աղոթքների շարքը»,- ասաց Մանսուրյանը՝ հավելելով՝ մեկ երեկոյի ընթացքում ներկայացվելու է ժողովրդական բանահյուսություն, հոգեւոր պոեզիա:
