ՀՀ-ն ԵԱՏՄ-ում մաքսատուրքերի առումով դոնորի կարգավիճակում է

ՀՀ էկոնոմիկայի նախարար Վահան Քերոբյանը հայտարարել է, որ Հայաստանը 2021 թվականի  կեսից ԵԱՏՄ բյուջե վճարած և ստացած մաքսատուրքերի առումով արդեն գտնվում է դոնորի կարգավիճակում, այսինքն՝ ավելի շատ տալիս է, քան ստանում։

Նախարարը նշել է, որ արդյունքում մոտ ապագայում կարիք կլինի միության բյուջեի վերաբաշխում կատարել. 

«Հայաստանն անցյալ տարվա կեսերից ԵԱՏՄ բյուջե վճարած և ստացած մաքսատուրքերի առումով արդեն գտնվում է դոնորի կարգավիճակում: Այսինքն՝ մենք ավելի շատ տալիս ենք, քան՝ ստանում: Քննարկումներ են գնում, ԵԱՏՄ նիստի ընթացքում վարչապետն էլ նշեց, որ կարիք կլինի մոտ ապագայում վերանայել ԵԱՏՄ բյուջեի բաշխումը: Ըստ էության, մենք, լինելով ավելի փոքր երկիր, արդեն հանդիսանում ենք բավականին խոշոր դոնոր և կարիք կա, որ մի քիչ ավելի արդար բաշխվածքի ճանապարհով գնանք»։

Ըստ Քերոբյանի՝ Հայաստանը բավական ակտիվացրել է սեփական ծրագրերը ԵԱՏՄ-ում, ավելի շատ նախաձեռնություններով է հանդես գալիս, փորձում իր դերը կառույցում ավելի ուժեղացնել. 

«Հայաստանի դերը, հեղինակությունը բարձրանում է ԵԱՏՄ-ում, անզեն աչքով էլ նկատելի է: Բազմաթիվ հարցերում Հայաստանի առաջարկները որոշիչ են դառնում, շատերն են մեր առաջարկներին ականջալուր լինում: Մեր դերակատարումը ԵԱՏՄ-ում մեծանում է»։