ՀՀ ԱԺ նախագահ Ալեն Սիմոնյանը ֆրանսիացի գործընկերոջ՝ Ֆրանսիայի ԱԺ նախագահ Յաել Բրաուն-Պիվեի հետ ասուլիսի ընթացքում հայտնեց, որ իրենց զրույցի ընթացքում անդրադարձ են կատարել տարածաշրջանային խնդիրներին ու Ադրբեջանի կողմից Լաչինի միջանցքի փակման հետևանքներին:

«Քննարկեցինք առկա իրավիճակը մեր տարածաշրջանում, քննարկեցինք այն բոլոր հարցերը, որոնք առաջացել են Լաչինի միջանցքի փակման հետ կապված, ես ներկայացրի առկա իրավիճակը: Կարող եմ վստահ ասել, որ մեր ֆրանսիացի գործընկերները բավականին լավ տեղեկացված են և ուշի ուշով հետևում են այն բոլոր գործընթացներին, որ տեղի են ունենում Հայաստանում և Արցախում, Լաչինի միջանցքի շուրջ:

Շնորհակալություն հայտնեցի իմ ֆրանսիացի գործընկերոջը Ֆրանսիայի կողմից բոլոր այն նախաձեռնությունների համար, որոնք միջազգային հարթակներում որպես նախաձեռնող հանդես եկան: Նաեւ շնորհակալություն եմ հայտնել նախագահ Մակրոնին իր բոլոր ջանքերի համար տարածաշրջանում խաղաղության հաստատման ուղղությամբ»,- նշեց Սիմոնյանը:

Ֆրանսիայի Ազգային ժողովի նախագահ Յաել Բրաուն-Պիվեն էլ իր հերթին նշեց, որ բռնկվող լարվածությունները ՀՀ-ին խոցելի են դարձնում, եւ Ֆրանսիան պետք է կանգնած լինի եղբայրական երկրների եւ ժողովուրդների կողքին, որոնք եւ որոնց տարածքային ամբողջականությունը ենթարկվում է հարձակումների։

Նրա խոսքով, Ֆրանսիան վերահաստատում է ՀՀ-ի եւ Ադրբեջանի միջեւ երկխոսության գործընթացին հավատարմությունը․

«Ֆրանսիան միշտ եղել է ՀՀ-ի կողքին՝ ամրապնդելու ինքնիշխանությունը։ Նախագահի եւ մեր երկրի զգոնությունն ամբողջական են, երբ ոտնահարվում են միջազգային իրավունքի սկզբունքներն Ուկրաինայում, երբ վտանգված են ժողովրդավարական արժեքները։ Այդ արժեքները մեր կողմնացույցն են, եւ Ֆրանսիան համերաշխ է ՀՀ-ի հետ։ Շատ անհանգիստ ենք Լեռնային Ղարաբաղում իրավիճակի առիթով։ Շարունակվող շրջափակումը մարդասիրական այնպիսի իրավիճակ է ստեղծում, որը վատթարանում է։ Կարեւոր է, որ ճանապարհը վերականգնվի, որ ազատ երթեւեկությունը վերականգնվի ՀՀ-ի եւ Ադրբեջանի միջեւ, ինտերնետ կապը եւ էլեկտրականությունը։ Ամեն ինչ անելու ենք, որ խուսափենք մարդասիրական աղետից։ Մտահոգ եմ նաեւ պատմամշակութային ժառանգությամբ, որը կարող է ոչնչացվել։ Մոտ 1500 հայկական պատմամշակութային նմուշները պետք է պահպանվեն։ Բոլոր կողմերի միջեւ երկխոսությունը պետք է վերականգնվի»։