Այսօր՝ հունվարի 27-ին լրանում է հայ մեծանուն կոմպոզիտոր, ՀՀ ժողովրդական արտիստ Տիգրան Մանսուրյանի 84-ամյակը։
Դեռ անցյալ տարվա հոկտեմբերին ազդարարվեց Տիգրան Մանսուրյանի անվան կոմպոզիտորների միջազգային մրցույթի մասին, որը նախաձեռնել է «Կողբ» կրթամշակութային հիմնադրամը։ Ուշագրավ է մրցույթի առանձնահատկությունը՝ ներկայացված երաժշտական ստեղծագործությունները պիտի գրված լինեն հայ դասական պոեզիայի հիման վրա։
Մրցույթի նպատակն է երաժշտարվեստի միջոցով հանրությանը ներկայացնել հայկական դասական պոեզիայի լավագույն նմուշները և այսպիսով ապահովել նաև հայ դասական պոեզիայի վերածնունդը մեր իրականության մեջ։ Մրցութային փուլերի արդյունքում ընտրված 6 լավագույն ստեղծագործությունները կներկայացվեն այս տարվա մայիս ամսին կայանալիք գալա-համերգի ընթացքում։
Իսկ մինչ այդ հունվարի 27-ին՝ Տիգրան Մանսուրյանի ծննդյան օրը, Արամ Խաչատրյան համերգասրահում Հայաստանի պետական կամերային երգչախմբի, Պետական կամերային նվագախմբի, Երևանի պետական կամերային երգչախմբի և բարիտոն Տիգրան Քախվեջյանի մասնակցությամբ տեղի կունենա «Մանսուրյան․ խոսքի և մեղեդու խաչմերուկին» խորագրով համերգը։
Համերգի ընթացքում կհնչեն միմիայն Մանսուրյանի հայ դասական պոեզիայի հիման վրա գրված ստեղծագործությունները։
