Անկախության տոնացույց․ Հունվարի 28-ը Հայոց բանակի օրն է

Հունվարի 28-ը ՀՀ զինված ուժերի կամ Հայոց բանակի օրն է։

Հայաստանի զինված ուժերի տոնը հաստատվել է 2001 թվականի հունվարի 6-ին Հայաստանի նախագահի ստորագրած «Հայաստանի Հանրապետության տոների և հիշատակի օրերի» մասին օրենքով։

Հայաստանի բանակի տոնը նշվում է հունվարի 28-ին, քանի որ 1992 թվականի նույն այդ օրը ընդունվեց «Հայաստանի Հանրապետության պաշտպանության վերաբերյալ» որոշումը։

Անուրանալի է ՀՀ զինված ուժերի դերը Արցախյան գոյամարտի ամբողջ ընթացքում, որի հերոսական դրվագներն ու փառավոր պատմությունները վաղուց դարձել են նորանկախ Հայաստանի և հայ ժողովրդի հպարտության առարկան։

Այսօր էլ, երբ Հայաստանը դիմագրավում է անվտանգային լրջագույն սպառնալիքներ, երբ հայությունը կանգնած է գոյութենական վտանգի առջև, երբ թուրք-ադրբեջանական տանդեմը շարունակում է ռազմատենչ ու ծավալապաշտական նկրտումները, Հայոց բանակն առավելագույն զգոնությամբ, նվիրումով ու զորավորությամբ կանգնած է սահմանին՝ վասն Հայրենիքի պաշտպանության։

Շնորհավո՛ր տոնդ, Հայոց փառապանծ բանակ, խաղաղություն, ուժ, արևշատություն ու բարգավաճում ձեզ, ռազմի հա՛յ նվիրյալներ։