ԱՄՆ նախագահ Ջո Բայդենը չի բացառի Իրանի հետ հարաբերություններում խնդիրների լուծման ռազմական ճանապարհը։

Այս մասին հայտնում է Al-Hadath-ը՝ հղում անելով Սպիտակ տան ներկայացուցչին։

«Նախագահ Բայդենը չի բացառի Իրան հետ հարաբերություններում ռազմական տարբերակը»,- ասել է հեռուստաալիքի աղբյուրը։

Նրա խոսքով՝ Սպիտակ տան ղեկավարը ցանկանում է վերադառնալ Իրանի հետ միջուկային գործարքին, սակայն այժմ «ժամանակը պատեհ չի թվում», և Թեհրանի հետ բանակցությունները ԱՄՆ իշխանությունների համար առաջնահերթություն չեն։ Ավելի վաղ ԱՄՆ ֆինանսների նախարարությունն ընդլայնել էր Իրանի դեմ պատժամիջոցների ցանկը, դրանում ընդգրկված էր տասը ֆիզիկական անձ։

Մինչ այս Լյուքսեմբուրգի արտգործնախարար Ժան Ասելբորնը հայտնել էր, որ ԵՄ երկրների արտգործնախարարները քննարկում են Իրանի դեմ պատժամիջոցների չորրորդ փաթեթը։ Պատժամիջոցների ցուցակում կարող են ներառվել ավելի քան 50 ֆիզիկական և մի քանի իրավաբանական անձինք։

Նշվում է, որ ԵՄ «սև ցուցակում» կլինեն Իրանի զինված ուժերի էլիտար ստորաբաժանումների՝ Իսլամական հեղափոխության պահապանների կորպուսի (ԻՀՊԿ) անդամներ։