Ամիսներ առաջ մեզ դիմել էին, Արաբկիր վարչական շրջանի Կոմիտասի պողոտայի 22-րդ շենքի 49 հասցեի մի խումբ բնակիչներ, բողոքելով, որ իրենց շենքի տակ, ապօրինի շինություն է հայտնվել, որը անհարմարություն է պատճառում իրենց և աղճատում է շենքի ճակատային դիմագիծը։ Նշենք, որ ի սկզբանե՝ շենքի ֆասադային հատվածի արդիականացման համար նախատեսված էսքիզը և այժմյան տեղակայված շինությունը բացարձակապես իրականությանը չեն համապատասխանում։ Բնակիչները նաև խնդրով պայմանավորված դիմել են բոլոր պատկան մարմիններին, սակայն որևէ պատասխան չեն ստացել։
Մենք, խնդրո առարկա հանդիսացող շինության համար գրավոր հարցմամբ դիմել էինք Երևանի քաղաքապետարան, պարզելու ի՞նչ գործողություններ են իրականացվում իրավիճակը շտկելու համար, որտեղից էլ ի պատասխան մեր հարցման նշել են․
«Հարգելի՛ Նվարդ Մելիքյան, Հարգելի Տիկին Մելիքյան, ի պատասխան Ձեր հարցման՝ ներկայացնում ենք Արաբկիր վարչական շրջանի Կոմիտասի պողոտա հ․22 շենք հ․49 հասցեում շենքի ճակատային մասի արդիականացման և գովազդի իրականացման հաստատված էսքիզային նախագծերը։ Միաժամանակ նշենք, որ թեմայի շուրջ աշխատակազմի քաղաքաշինության և հողի վերահսկողության վարչությունը իր գործառույթների շրջանակում իրականացնելու է մասնագիտական ուսումնասիրություն՝ խնդրո առարկան ուսումնասիրելու և տնտեսվարող սուբյեկտի նկատմամբ օրենքով սահմանված վարչական պատասխանատվության միջոցներ կիրառելու համար: Արդյունքների վերաբերյալ հետագայում կտրվի լրացուցիչ տեղեկատվություն»:
Փաստորեն ստացվում է, որ քաղաքային իշխանությունը և բոլոր պատասխանատու մարմինները տեղյակ են խնդրից, սակայն հարցը շարունակում է չլուծված մնալ։
