Հունվարի 19-ին Գեղարքունիքի մարզի Ազատ գյուղի զորամասում տեղի ունեցած ողբերգական հրդեհի գործով որպես մեղադրյալ ներգրավված վաշտի կապիտանը հրաժարվել է ցուցմունք տալ:
Այս մասին տեղեկությունը հաստատել է ՀՀ քննչական կոմիտեի նախագահի մամուլի քարտուղար Գոռ Աբրահամյանը՝ նշելով, որ կապիտանին մեղադրանք արդեն ներկայացվել է ՀՀ ՔՕ 532-րդ հոդվածի 4-րդ մասով, այն է՝ զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու և ավելի անձի մահ։
Հիշեցնենք՝ կապիտանը հրդեհից տուժածներից մեկն է, 2 օր առաջ նա վերակենդանացման բաժանմունքից տեղափոխվել է հիվանդասենյակ։
Այսօր ՀՀ գլխավոր դատախազությունից էլ հայտնել էին, որ վաշտի կացարանում վառարանն ավտոբենզինով վառել փորձած Ե. Հ-ի նկատմամբ հանրային քրեական հետապնդում է հարուցվել:
07:46
Օգոստոս 10, 2026
