ԱԺ «Հայաստան» խմբակցության պատգամավոր Լիլիթ Գալստյանը ԱԺ-ում հանդես է եկել հայտարարությամբ․ ելույթից որոշ հատվածներ ներկայացնում ենք ստորև․
«Այս օրերին, երբ շարունակվում է Արցախի շրջափակումը, երբ Արցախի մեր հազարավոր քուրեր ու եղբայրեր՝ դիմագրավելով ծանրագույն հումանիտար ճգնաժամը, պայքարում են իրենց սեփական հողում ապրելու և ինքնորոշվելու իրավունքի համար, երբ գոյաբանական սպառնալիքն ավելի քան ակնհայտ է, երբ մեր շուրջ ծավալվող աշխարհաքաղաքական զարգացումներն օրեցօր մոտեցնում են պատերազմի հավանականությունը, երբ Ադրբեջանը բացահայտ ցինիկությամբ հրապարակայնացնում է էթնիկ զտումների և ցեղասպանական նկրտումների իր վարքագիծը, երբ աշխարհասփյուռ հայությունը փորձում է արթնացնել մարդկության խիղճն ու աշխարի ուշադրությունը սևեռել թուրքադրբեջանական օղակում սեղմվող մեր հայրենակիցների ապրելու իրավունքի վրա, այստեղ, Արցախի թիկունքում, Հայաստանի թիվ մեկ քաղաքական ամբիոնից ներազգային թշնամանքի և ազգային պառակտման տեքստեր են հնչում:»-նշել է պատգամավորը:
Մասնավորապես իր խոսքում Գալստյանը նշել է, որ Արցախի ճակատագիրը մեր հավաքական ճակատագիրն է, մեր անվտանգային համակարգի անբաժանելի բաղադրիչը: «Այն երբեք որեւէ քաղաքական ուժի մենաշնորհը չի եղել և չի լինելու։ Ձեզ նաև ոչ ոք իրավունք չի տվել ուրանալու Արցախի Հանրապետության գոյության իրավունքը, մեր տեւական համազգային պայքարը:»-նկատել է նա:
Պատգամավորը նշել է, որ Արցախի Հանրապետության Ազգային ժողովի բոլոր խմբակցությունները՝ խստորեն դատապարտելով «ՔՊ» խմբակցության պատգամավոր Գուրգեն Արսենյանի վտանգավոր վարքագիծը և համոզմունք են հայտնել, որ այդօրինակ արտահայտությունները ոչ միայն չեն բխում հայ ժողովրդի շահերից, այլև ջուր են լցնում թուրք-ադրբեջանական տանդեմի ջրաղացին: գալստյանը այս առիթով առաջարկել է հարցը քննարկել էթիկայի հանձնաժողովում:
