Հայաստանում քրեական հեղինակությունների շարժը և գործունեությունը վերջին 20 տարիների ընթացքում միշտ եղել է իշխանության ներկայացուցիչների թողտվության և բարձր հովանու ներքո։ Նոր Հայաստանում հենց ամենասկզբից ուժայինների կազմակերպած ռեյդերը, մեր կարծիքով, այլընտանք չունեին և դիտարկվեցին որպես քրեական աշխարհին սթափեցնելու քայլեր՝ մասկի շուոներ, ասֆալտին փռելու օպերացիաներ, բացատրական աշխատանքներ։
Առհասարակ, Հայաստանում ուժի կիրառման իրավունքը պատկանում է ՀՀ օրենսդրությամբ վերապահված մարմիններին։ Քրեական աշխարհի ներկայացուցիչները կա՛մ պետք է վերանայեն իրենց սովորությունները, կա՛մ հեռանան Հայաստանից։
Վերջին շաբաթվա ընթացքում տեղի ունեցան 2 իրադարձություններ, որոնք առանձնացան ընդհանուր լրահոսից։ ՀՀ ոստիկանության մի քանի ծառայող, ակնհայտ ոչ տեղին և ոչ համաչափ ուժ կիրառելով, ընդգծված նվաստացուցիչ վերաբերմունքի արժանացրին բերման ենթարկվողներից մեկին։ Տեսանյութում պարզ երևում է, որ Արթուր Ասատրյանը, նույն ինքը՝ Դոն Պիպոն, չի դիմադրում և փորձում է բացատրություն պահանջել իրեն ձերբակալողներից։ Արթուր Ասատրյանին պառկեցնում են ասֆալտին, պահում այնքան ժամանակ, մինչև քաղաքացիական հագուստով ոստիկաններից մեկը կնկարի նրան, որից հետո բարձրացնում և տեղափոխում են բաժանմունք։ Եթե նրա արարքներում կար նման ձևով բերման ենթարկելու առիթ, ապա դա պարտավոր էին անել հատուկ ջոկատայինները, և հարցեր չէին առաջանա։ Այն, ինչ տեսնում ենք տեսանյութում, սովորական «մենթական» բեսպրեդել է։ Արթուր Ասատրյանը, որքան էլ նրա անվան շուրջ պտտվող պատմությունները լինեն իրական կամ հորինովի, Հայաստանում և սփյուռքում ունի բարձր հեղինակություն և միշտ հարգալից վերաբերմունք է դրսևորել հասարակության լայն շրջանակների հետ շփումներում, մասնավորապես՝ իրավապահ մարմինների հետ։
Անընդունելի է առհասարակ ուժի կիրառումն այնտեղ, որտեղ դրա կարիքը բացարձակ չկա, և պետք է որ Նոր Հայաստանի ոստիկանության համար սա լիներ անքննելի իրականություն։
Այս տեսարանի ֆոնին տեղի է ունենում հաջորդ իրադարձությանը․ ոստիկանությունը բերման է ենթարկում օրենքով գող Պզոյին, որը արդեն բաժանմունքի ներսում, բազմաթիվ իրավապահների ներկայությամբ, րոպեներ շարունակ ամենավերջին լկտի հայհոյանքներով վիրավորում է ոստիկանության աշխատակիցներին։ Այդ մի քանի րոպեների ընթացքում մենք ականատես եղանք, թե ոստիկաններն առանց միջամտելու ինչպես են լսում Պզոյին և ցուցաբերում ակնհայտ զգուշավորություն՝ ՀՀ քաղաքացիների աչքերում հեղինակազրկելով ոստիկանությանը։
Պարոն Օսիպյան, շնորհավորում ենք, Դուք ձախողվեցիք որպես ոստիկանապետ։
