Էրդողանը նախընտրական քարոզարշա՞վ է սկսել երկրաշարժի զոհերի հաշվին

Թուրքիայում տեղի ունեցած աղետալի երկրաշարժը, թվում է, պիտի այդ երկրի իշխանություններին, գլխավորությամբ՝ նախագահ Ռեջեփ Թաիբ Էրդողանի, պիտի զսպեր քաղաքական ու այս ընթացքում նախընտրական ախորժակը։ Մինչդեռ, բոլորովին այլ նախանշաններ են ի հայտ գալիս։

Այսպես, Թուրքիայում այս տարվա մայիսի 14-ին նախանշված համընդհանուր՝ խորհրդարանական ու նախագահական ընտրությունները, որտեղ առաջադրվել է նաև Էրդողանը, հետաձգելու մտադրություն չկա։

Այս մասին հայտնում է Bloomberg-ը՝ հղում անելով իրավիճակին ծանոթ պաշտոնյաներին։ Փետրվարի 7-ին Էրդողանը հայտարարել է երկրում 90 օրով արտակարգ դրություն մտցնելու մասին։

Bloomberg-ի աղբյուրների խոսքով՝ նախագահը ծրագրում է ընտրություններն անցկացնել մայիսի 14-ին, Ինչպես նախապես պլանավորված էր, իսկ արտակարգ դրությունը կարող է ավելի շուտ ավարտվել:

Բացի այդ, Էրդողանն անձամբ՝ աղետի գոտի այցելելով, համակարգում է երկրաշարժի հետևանքները վերացնելու աշխատանքները և պարբերաբար հանդես է գալիս զոհերի և վիրավորների մասին տվյալներ հրապարակելու առաքելությամբ, այդպիսով՝ կամենալով բարձրացնել իր վարկանիշն ընտրողների շրջանում։

Աղետի գոտում նա հայտարարեց, որ կառավարությունը մտադիր է մեկ տարում բնակարաններով ապահովել բնաղետից տուժած քաղաքացիներին։ Սա կարող է սովորական թվալ՝ երկրի ղեկավարի դիրքերից արած հայտարարության մակարդակում, բայց եթե համադրում ենք նախընտրական շրջանի հետ, ապա այդ ամենը խոստման պես է հնչում։

Ինքը՝ Թուրքիայի նախագահը թեպետ հորդորել է երկրաշարժը չքաղաքականցնել, այդուհանդերձ, իր քայլերով ու հայտարարություններով անում է ճիշտ հակառակը։

Ի դեպ, Էրդողանը շնորհակալություն հայտնելով Ադրբեջանի նախագահ Իլհամ Ալիևին բնաղետի ժամանակ ցուցաբերած աջակցության համար, նշել է, թե ինչպես իրենք էին Ղարաբաղյան պատերազմի ժամանակ իրենց եղբայր ադրբեջանցիների կողքին, այնպես էլ հիմա Ադրբեջանն է Թուրքիայի կողքին։

Հատկանշական է, որ սա ասում է այն ժամանակ, երբ ՀՀ վարչապետ Նիկոլ Փաշինյանը զանգահարել և ցավակցել է իրեն, իսկ Հայաստանը Թուրքիա է ուղարկել փրկարարաների։

Ղարաբաղի և Բաքվի հետ սիրախաղի մասին՝ Էրդողանի ակնարկը նույնպես կարելի է դիտել նախընտրական քարոզարշավի համատեքստում, որովհետև մի կողմից, այդպիսով, նա սիրաշահում է Թուրքիայում ապրող էթնիկ ադրբեջանցի ընտրողներին, մյուս կողմից՝ Փաշինյանին շնորհակալություն հայտնելով ու ՀՀ աջակցությունը բարձր գնահատելով, որոշակի փորձ է անում իր կողմը գրավել նաև իր երկրում ապրող ազգությամբ հայ քաղաքացիներին։

Այնպես որ, ենթադրելու իրավունք կա, որ Էրդողանը սկսել է իր նախընտրական քարոզարշավը՝ շուրջ 18 հազար մարդու կյանք խլած երկրաշարժի հաշվին։