«Կառավարությունը որոշակի նոր փիլիսոփայություն է առաջարկում, այսինքն՝ ատեստավորման միջոցով աշխատավարձի աճի կամ վարձատրության աճի մեխանիզմ եք գործադրում։ Արդեն պատկերացնո՞ւմ եք, թե ի՞նչ գումարի մասին է խոսքը, կամ կանխատեսմամբ որքա՞ն բարձրացում կարող է լինել, և երկրորդ՝ արդյո՞ք սա վերաբերվում է Ազգային անվտանգության մարմիններ համարվող արտաքին հետախուզական այն ծառայությանը, որը պետք է ստեղծվի, թե՞ միայն ԱԱԾ-ի համար է»,- ԱԺ-ում «Ազգային անվտանգության մարմիններում ծառայության մասին» օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթը քննարկելու ընթացքում ԱԱԾ տնօրենի տեղակալ Անդրանիկ Սիմոնյանից հետաքրքրվեց «Հայաստան» խմբակցության պատգամավոր Արծվիկ Մինասյանը։
Ի պատասխան ԱԱԾ տնօրենի տեղակալը նշեց, որ հավելավճարի չափը սահնանվելու է կառավարության որոշմամբ, իսկ ատեստավորվող ծառայողների ցանկը՝ ԱԱԾ տնօրենի հրամանով․ «Հետևաբար, այս պահին ֆինանսական հաշվարկի վերաբերյալ ես որևէ տեղեկություն չեմ կարող ներկայացնել»։ Սիմոնյանը նաև նշեց, որ կարգավորումները վերաբերվում են բացառապես ԱԱԾ-ին։
