Ռուսաստանի Դաշնության նախագահ Վլադիմիր Պուտինն «ահաբեկչական հարձակում» է անվանել Բրյանսկի շրջանում ուկրաինացիներին վերագրվող այսօրվա զինված հարձակումը:
«Դա հերթական հանցագործությունն է, տեսել են, որ քաղաքացիական մեքենա է, սովորական «Նիվա», որում քաղաքացիական անձինք են, երեխաներ, և կրակ են բացել»,- ասել է Պուտինը:
Այդ մեկնաբանությամբ նա հանդես է եկել «Դաստիարակների դպրոց» պիլոտային կրթական ծրագրի մասնակիցների հետ առցանց հանդիպման ընթացքում:
Այսօր մի խումբ զինյալներ հայտնվել են Ուկրաինայի հետ սահմանակցող Բրյանսկի շրջանի տարածքում: Ըստ ռուսական կողմի, զինյալները կրակ են բացել, զոհվել է մեկ մարդ, վիրավորվել է մեկ երեխա, զինյալները, ենթադրաբար, պատանդառել են մի քանի բնակիչների:
Ռուսաստանի անվտանգության դաշնային ծառայությունը հայտնել է, որ իրականացվում է «սահմանախախտներին վնասազերծելու գործողություն»:
Մոսկվան ուկրաինացիներին է վերագրում գրոհը: Մինչդեռ, Ուկրաինայի նախագահի աշխատակազմի խոհրդական Միխայիլ Պոդոլյակը Բրյանսկի շրջանում հարձակմանն ուկրաինացիների առնչության մասին Մոսկվայի լուրն անվանել է «կեղծիք»:
«Ռուսաստանում ուկրաինացի դիվերսանտների մասին պատմությունը դասական միտումնավոր սադրանք է: Դուք ձեր պարտիզաններից վախեցեք», – Թվիթերում գրել է Պոդոլյակը:
