Ռուսաստանի Դաշնության նախագահ Վլադիմիր Պուտինը հեռախոսազրույց է ունեցել Իրանի Իսլամական Հանրապետության նախագահ Էբրահիմ Ռաիսիի հետ։
Այս մասին տեղեկացնում է ռուսական ՏԱՍՍ լրատվական գործակալությունը՝ հղում անելով Կրեմլի մամուլի ծառայությանը։ Հաղորդվում է, որ Պուտինը Ռաիսիի հետ քննարկել է երկու երկրների միջև համատեղ ենթակառուցվածքային նախագծերի իրականացումը։
Տարածված հայտարարության համաձայն երկու նախագահները դրական են գնահատել Մոսկվայի և Թեհրանի միջև հարաբերությունների զարգացման մակարդակը և դինամիկան։ Բացի այդ Ռուսաստանի և Իրանի նախագահներն անդրադարձել են տարբեր ոլորտներում երկկողմ համագործակցության հարցերին։ Կրեմլից հայտնել են նաև, որ կողմերը պայմանավորվածություն են ձեռք բերել շարունակել հետագա շփումները։
Նշենք, որ Պուտինի և Ռասիսիի այսօրվա հեռախոսազրույցը երրորդն է՝ 2023 թվականի սկզբից ի վեր։ Ռուսաստանի Դաշնության և Իրանի կողմից իրականացվող կարևոր ենթակառուցվածքային նախագծերից մեկը Հյուսիս-Հարավ միջանցքն է։ Հյուսիս-Հարավ մուլտմոդալ տրանսպորտային միջանցքի ստեղծման մասին միջկառավարական համաձայնագիրը ստորագրվել է Ռուսաստանի, Հնդկաստանի և Իրանի կողմից 2000 թվականին, իսկ հետագայում ծրագրի մասնակիցների թիվը հասավ 14-ի:
Ծրագրի նպատակն է Հնդկաստանից, Իրանից և Պարսից ծոցի երկրներից դեպի Եվրոպա բեռնափոխադրումների տարանցիկ հոսքերն իրականացնել Ռուսաստանի տարածքով։ Այս նախագծի արդյունքում՝ Սուեզի ջրանցքով ծովային ճանապարհի համեմատ, հեռավորությունն ավելի քան կիսով չափ կրճատվել է, ինչը նվազեցնում է փոխադրման ժամանակն ու արժեքը: Այժմ նախագիծը միավորում է առանձին պետությունների մի քանի տարբեր տրանսպորտային համակարգեր:
