Շիրակի մարզի փաստաբանները պատրաստվում են գործադուլ անել, պատկան մարմինները պետք է հասկանան, որ Շիրակի մարզում իրավիճակը ծայրահեղ խնդրահարույց է։ Մարզի դատարանների դատավորները պարբերաբար փոխվում են՝ ինքնահոսի թողնելով դատական գործերը, ինչի պատճառով Շիրակի մարզի դատարանները պարալիզացվում են։
Այս մասին այսօր Փաստաբանների պալատում մարզի փաստաբանների հրավիրած ասուլիսի ընթացքում հայտարարեց փաստաբան Արամայիս Հայրապետյանը՝ նշելով, որ վերջին տարիներին դատավորների հաճախակի տեղափոխությունների պատճառով Շիրակի մարզում, ըստ էության, գործ ունեն մերժված արդարադատության հետ։
«Որևէ դատավոր գործն ընդունում է իր վարույթում, սկսում է գործի քննությունը, հասնում է որոշակի փուլի, տեղափոխվում է այլ դատարան, նոր եկած դատավորը ստիպված է լինում այդ գործը սկսել զրոյից։ Քաղաքացիները, որոնց գործերը գտնվում են դատաքննության փուլում, տարիներ շարունակ չեն կարողանում իրենց գործով որևէ ելքի հասնել»,- ասաց փաստաբանը։ Փաստաբանի խոսքով՝ գործերը հիմա այնքան են կուտակվել, որ նույնիսկ հաստիքների լրիվ համալրման դեպքում Շիրակի մարզում գործերի ողջամիտ ժամկետ հնարավոր չէ պահպանել․
«Գործերն այնքան են կուտակվել, որ հաստիքների նույնիսկ համալրման դեպքում Շիրակի մարզում գործերի քննության ողջամիտ ժամկետ հնարավոր չէ պահպանել։ Վերջին երկու-երեք տարում Շիրակի մարզում 13-14 դատավորների տեղափոխություն է եղել, այսինքն՝ ողջ կազմի: Ավելին, Շիրակի մարզում ամենաերկար մնացած դատավորը մնացել է մոտ մեկ տարի։ 1-1.5 տարի աշխատում են, անգամ՝ մի քանի ամիս աշխատում են, հետո տեղափոխվում Երևան կամ այլ մարզեր, որի արդյունքում նրա վարույթում գտնվող քրեական գործերը գումարվում են նոր գործերին, տրվում է այլ դատավորի, ստացվում է, որ ամիսներ շարունակ քրեական գործը քննում են, ռեսուրսներ վատնում, բայց գործը որևէ լուծում չի ստանում»։
Արամայիս Հայրապետյանն ընդգծեց, որ տեղափոխությունների պատճառով առաջացած խնդիրներից է նաև քաղաքացիների իրավունքների մասսայական խախտումները։
