«2018-ին հռչակած արժեքների մեջ էր նաեւ կոռուպցիայի դեմ պայքարը եւ պայքարի մի մասն է սա: Մեր իրավապահ համակարգն աչալուրջ հետեւում է, եւ իր գործունեությունը ծավալում է, ինչը բոլորդ տեսնում ենք: Մյուս կողմից մենք իրավունք չունենք խախտել մարդկանց անմեղության կանխավարկածը, իրավունք չունենք գնահատական տալ մինչեւ դատարանի որոշումը»,-խորհրդարանում, լրագրողների հետ զրույցում այսօր, հայտարարեց իշխող խմբակցության պատգամավոր Վաղարշակ Հակոբյանը՝ պատասխանելով հարցին՝ ինչո՞վ է պայմանավորված, որ իշխանության տարբեր ներկայացուցիչներ հայտնվում են կոռուպցիայի կիզակետում:
Հարցը վերաբերվում էր կորոնավիրուսի համավարակի չարաշահումներով պայմանավորված վերջին քրեական գործերին եւ ձերբակալություններին:
Լրագրողի դիտարկմանը՝ ինչո՞ւ են իշխող թիմի տարբեր անդամներ «նախկինների» դեպքում դեռեւս ուժի մեջ չմտած գործերի վերաբերյալ բնութագրում նրանց, որպես թալանչիներ, Վաղարշակ Հակոբյանն ասաց. «Նախկինների հետ մեզ համեմատելու բոլոր փորձերն ապարդյուն են, ես նույնիսկ եզրեր չեմ տեսնում»:
Լրագրողները հարցեր տվեցին նաեւ այդ շրջանում առողջապահության նախարար եղած Արսեն Թորոսյանի մասով, ով կասկածի տակ էր դրել հակակոռուպցիոն կոմիտեի աշխատանքը: «Նրան առնչվող գնահատականների հետ կապված՝ հարգենք պարոն Թորոսյանի անմեղության կանխավարկածը եւս: Պարոն Թորոսյանի տված գնահատականների հետ կապված ես չեմ կարող այժմ բնորոշումներ տալ, նա ինքը պետք է մեկնաբանի»,- ասաց Արսեն թորոսյանի կուսակիցը:
Իսկ հարցին՝ եթե դատախազը խորհրդարան գա՝ Արսեն Թորոսյանին անձեռնմխելիությունից զրկելու հարցով, կողմ կքվեարկե՞ք, Վաղարշակ Հակոբյանը պատասխանեց. «Եկեք «եթե»-ներով չխոսենք: Ես կարծում եմ, որ եւս մեկ անգամ պետք է շատ ուշադիր լինել գնահատականների հետ կապված: Ես խնդրում եմ՝ չխախտել պարոն Թորոսյանի անմեղության կանխավարկածը: Ես անգամ չգիտեմ՝ պարոն Թորոսյանն այդ գործով անցնո՞ւմ է, չի՞ անցնում, ի՞նչ կարգավիճակ ունի»:
