2023 թվականի փետրվարին 12–ամսյա գնաճը Հայաստանում շարունակում է նվազել և ամսվա վերջին կազմել է 8.1 տոկոս։ Այս մասին այսօր մամուլի ասուլիսի ժամանակ հայտարարեց ԿԲ նախագահ Մարտին Գալստյանը։ Նա տեղեկացրեց, որ Կենտրոնական բանկի խորհուրդն այսօր որոշել է վերաֆինանսավորման տոկոսադրույքը թողնել անփոփոխ` սահմանելով 10.75 տոկոս։
ԿԲ նախագահի հավաստմամբ, 2023 թվականի սկզբին ՀՀ տնտեսությունում արձանագրված բարձր ակտիվությունը պահպանվում է, ինչին շարունակում է նպաստել ծառայությունների և շինարարության ոլորտներում արձանագրվող բարձր աճը։
«Բարձր ակտիվությունն ուղեկցվում է արդյունաբերության և ծառայությունների ճյուղում դիտվող արտահանման և ՀՆԱ–ի ներուժի ավելացմամբ։ Իրականացվող դրամավարկային քաղաքականության, դրամի արժևորման և արտաքին հատվածից գնաճային ազդեցության թուլացման արդյունքում ՀՀ ընդհանուր գնաճային միջավայրը շարունակում է մեղմվել»,–շարունակեց ընթերցանությունը պարոն Գալստյանը՝ հավելելով, որ այնուամենայնիվ, բարձր պահանջարկն ու գնաճային սպասումները դեռևս նպաստում են աշխատավարձերի և առանձին ապրանքների ու ծառայությունների գների աճին։
ԿԲ նախագահը հայտնեց, որ ԿԲ–ի խորհուրդը նպատակահարմար է գտնում վերաֆինանսավորման տոկոսադրույքը թողնել անփոփոխ և հետևողական է լինելու գնաճի կայունացման գործում` չեզոքացնելով գնաճային սպասումների «ապախարսխման ցանկացած ռիսկ»։
