Անցած տարի Հանրապետությունում, փաստացի գներով, թողարկվել է 104,5 միլիարդ դրամի արդյունաբերական արտադրանք։
Այս մասին այսօր՝ մարտի 14-ին, տեղեկացրել է Արցախի Հանրապետության Ազգային վիճակագրական ծառայության նախագահ Մանուշ Մինասյանը՝ ամփոփելով 2022 թվականի սոցիալ-տնտեսական ցուցանիշները։
«Իրացվել է 103,2 միլիարդ դրամի պատրաստի արտադրանք: Նախորդ տարվա նկատմամբ արդյունաբերական արտադրանքի ֆիզիկական ծավալի ինդեքսը կազմել է 136,9 տոկոս, հանքագործական արդյունաբերությունում և բացահանքերի շահագործման ոլորտում` 181,2 տոկոս, մշակող արդյունաբերությունում` 82.3 տոկոս, էլեկտրականության, գազի, գոլորշու և լավորակ օդի մատակարարման 111 տոկոս, իսկ ջրամատակարարման, կոյուղու, թափոնների կառավարման և վերամշակման 103,2 տոկոս: Արդյունաբերական արտադրանքի կառուցվածքն ըստ բաժինների հետևյալն է. հանքագործական արդյունաբերություն և բացահանքերի շահագործում` 58 տոկոս, մշակող արդյունաբերություն` 21.5 տոկոս, էլեկտրականության, գազի, գոլորշու և լավորակ օդի մատակարարում` 19.9 տոկոս և ջրամատակարարում, կոյուղի, թափոնների կառավարում և վերամշակում` 0.6 տոկոս»,-ներկայացրել է Մ. Մինասյանը։
Ըստ ԱՎԾ նախագահի՝ Ստեփանակերտի արդյունաբերական կազմակերպությունների կողմից թողարկվել է ընդհանուր արդյունաբերական արտադրանքի 29,8 տոկոսը, իսկ շրջաններից ամենամեծ մասնաբաժինն ունի Մարտակերտի շրջանը` 59,2 տոկոս:
«Արդյունաբերական կազմակերպությունների ընդհանուր քանակում գերակշռել են գերփոքր և փոքր կազմակերպությունները, որոնց տեսակարար կշիռները կազմել են համապատասխանաբար` 71,5 և 20,8 տոկոս: Հատկանշական է, որ 92,3 տոկոս կազմող գերփոքր և փոքր կազմակերպությունները թողարկել են արդյունաբերական արտադրանքի ընդհանուր ծավալի 17,9 տոկոսը, այն դեպքում, երբ կազմակերպությունների ընդհանուր թվաքանակում 7,7 տոկոս կազմող միջին և խոշոր կազմակերպություններին բաժին է ընկել արդյունաբերական արտադրանքի ամբողջ ծավալի 82,1 տոկոսը»,-նշել է Մ. Մինասյանը։
Նրա տեղեկատվությամբ՝ նախորդ տարվա համեմատ աճել են պահածոների, շինանյութերի հիմնական տեսակների, արդյունահանված խտանյութի, որոշ խմիչքների, կաթնամթերքի որոշ տեսակների, մսի, բամբակյա գործվածքների արտադրության ծավալները գործվածքների արտադրության ծավալները:
