3-րդ բանակային կորպուսի նախկին հրամանատար, կալանավորված գեներալ Գրիգորի Խաչատուրովի փաստաբան Միհրան Պողոսյանն այսօր որոշ մանրամասներ է հայտնել քրեական գործից։
Փաստաբանի խոսքով, օտարվել է ոչ թե զորամաս, այլ՝ շենք շինություն. «Ես բերել եմ Էդգար Արշակյանի անվամբ սեփականության վկայականի պատճեն, ում ըստ մեղադրանքի հետագայում վաճառվել է գույքը, այնտեղ տրված են շենք- շինությունների նկարագրությունները։ Հստակ երևում է, որ այստեղ որևէ զորանոց չկա»,– նշեց նա։ Ըստ փաստաբանի, սա եղել է ՊՆ–ին ամրակցված տարածք, որը ՊՆ-ն որոշել է վաճառել. «Ավելին` դա անթույլատրելի արարք կամ գործարք չէ։ Վերջին 5 տարում վաճառվել է ՊՆ–ի ամրակացված տարածքներից 71 միավոր, ու ոչ մեկի մասին խոսք անգամ չի ասվել»։
