«Ամոթալի է, որ Բաքու-Ստեփանակերտ «ինտեգրման բանակցությունների» վերաբերյալ Ալեն Սիմոնյանը բառացի ասում է, որ դեռեւս ճանապարհ կա անցնելու։ Այսինքն, Ալեն Սիմոնյանը չի բացառում բացարձակապես ադրբեջանական օրակարգի՝ «վերաինտեգրման» օրակարգի հավանականությունը։ Մի բան էլ ասում է, թե ճանապարհ կա անցնելու։ Սրան առաջնահերթ պետք է գնահատական տա ժողովուրդը, եւ առաջնահերթ այն մարդիկ, որոնք 2021թ․-ին սխալմամբ ձայն են տվել իրենց»,-խորհրդարանում լրագրողների հետ ճեպազրույցում այսօր անդրադառնալով ԱԺ նախագահ Ալեն Սիմոնյանի հայտարարություններին՝ ասաց ԱԺ «Պատիվ ունեմ» խմբակցության պատգամավոր Հայկ Մամիջանյանը։
Նկատառմանն ի պատասխան, որ Ալեն Սիմոնյանը «հավանականությունը ռեալ չի համարել», Հայկ Մամիջանյանն ասաց․ «Չի համարում, բայց ճանապարհ անցնելու մասին է խոսում։ Այսինքն, չի ասում, որ դա անընդունելի է եւ հակասում է Արցախի դիրքորոշմանը։ Ինձ համար նաեւ անհասկանալի են նրա ուղիղ ակնարկները եւ ճնշումն Արցախի իշխանության վրա՝ արտաքին քաղաքական ուղղվածության առնչությամբ։ Նաեւ նա, զարմանալի չէ, որ լավ չի տիրապետում արցախյան շարժմանը։ Այո, այն մեկնարկել էր որպես բնապահպանական շարժման շարունակություն, բայց՝ Երեւանում, մայր Հայաստանում։ Էկոլոգիական շարժումը վերածվեց համազգային արցախյան շարժման»։
