Այսօր ԱԺ հայտարարությունների ժամին «Պատիվ ունեմ» խմբակցության քարտուղար Տիգրան Աբրահամյանն ասաց, որ Ադրբեջանը պատերազմի սպառնալիքն աստիճանաբար վերածում է մահակի՝ իր ժողովրդին նախապատրաստելով ոչ թե խաղաղության, այլ՝ պատերազմի.
«Այն քայլերը, որն իշխանությունն իրականացնում է գետնի վրա, ցույց է տալիս, որ կա՛մ իշխանությունը լավ չի պատկերացնում, թե մեզ ինչ ծանր հարված է սպասվում, կա՛մ այդ ամենը հասկանալով՝ նպատակաուղղված դաշտ է նախապատրաստում նոր, ծանր կորուստների համար: Ինչո՞ւ դաշտ նետվեց դավաճանների, 5-րդ շարասյան թեման, ո՞ւմ համար էր ձեռնտու պատերազմական գործողությունների վերսկսման բարձր հավանականության պայմաններում՝ համատարած բոլորին դավաճան անվանել, նույնիսկ այն պայմաններում, երբ թիրախավորված անձանց, այդ թվում՝ զինվորականների նկատմամբ կամ համապատասխան հոդվածներով քրգործեր չկան, կամ դատավճռի փուլ չեն հասել: Դեպքեր ենք ունեցել, երբ պետական դավաճանության հոդվածով հաղորդագրություն են տարածել, ավելի ուշ գործը կարճվել է, վերոնշյալ զինվորականը վերականգնվել է զինված ուժերում:
Ո՞ւմ է պետք այս ծանր ժամանակահատվածում վարկաբեկել, որեւէ մեկի ծանր հանցագործությունը ուղղակի կամ անուղղակի կերպով տարածել բանակի եւ զինվորականության վրա: Վերջին շրջանում իշխանության թիրախներից է 3-րդ բանակային կորպուսի նախկին հրամանատար Գրիգորի Խաչատուրովը: Խաչատուրովին չեն ներում հաղթող հայր ունենալը, ադրբեջանցիների մռութը ջարդելը ու իր էներգիան անմնացորդ հայրենիքին նվիրելու ձգտումը: Այն քրեական գործը, որով անցնում է գեներալը,մեկ բառով կոչվում է փուչիկ»:
