ՀՀ ԱԳ նախարար Արարատ Միրզոյանը, պատգամավոր Արուսյակ Ջուլհակյանի հարցին ի պատասխան, անդրադարձել է փախստականների վերադարձի խնդրին։ 

Միրզոյանը նշել է, որ ՀՀ ԱԳՆ-ն 2020թ. եռակողմ հայտարարության ստորագրումից գրեթե անմիջապես հետո աշխատանքներ է սկսել ՄԱԿ փախստականների հարցով բարձր հանձնակատարի հետ՝ ապահովելու փախստականների վերադարձը ԼՂ և ադրբեջանական վերահսկողության ներքո հայտնված հարակից տարածքներ. «Իմ՝ ԱԳ նախարար նշանակվելուց հետո այդ աշխատանքները շարունակվել են, կա նամակագրություն, տեղի է ունեցել մի քանի հանդիպում, հարցը շարունակում է քննարկվել»։ Ըստ Միրզոյանի՝ կան խոչընդոտներ, որոնք հարուցում է ադրբեջանական կողմը. «Այստեղ ևս հայկական կողմը ձգտում է լինել առավելագույնս կառուցողական»։

Միրզոյանը շեշտել է, որ ԼՂ հայ բնակչության համար իրական էթնիկ զտումների, ցեղասպանության վտանգ կա. «Սա անթաքույց կերպով դրսևորվում է ադրբեջանական ամենաբարձր պաշտոնյաների հայտարարություններում, խոսույթներում, և այստեղ ՄԱԿ-ն իսկապես անելիք ունի»։