Ֆրանսիայի Սենատի անդամ Վալերի Բուայեն Ադրբեջանի կողմից Արցախի շրջափակման 100 օրվա հետ կապված՝ համերաշխություն է հայտնել հայ ժողովրդին։ Նա համապատասխան գրառում է արել թվիթերյան միկրոբլոգում:
«100 օր է անցել Ադրբեջանի կողմից Լաչինի միջանցքը փակելուց հետո, Արցախն ու նրա 120 000 բնակիչներն անխիղճ կերպով կտրվել են ամբողջ աշխարհից։ Ես մտածում եմ հայերի մասին և ցանկանում եմ մեկ անգամ ևս նրանց հայտնել իմ համերաշխությունն ու մեծ բարեկամությունը», -գրել է քաղաքական գործիչը ու Արարատի ֆոնին արված արխիվային լուսանկար հրապարակել։
Հիշեցնենք` 2022-ի դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։ Լաչինի միջանցքը շարունակում է փակ մնալ։
