Ոստիկաննները մարտի 31-ին Խորենացու փողոցի 28 հասցեի մոտ ապօրինի զենք, զինամթերք պահելու և կրելու հիմնավոր կասկածանքով ձերբակալել ու Ոստիկանության կենտրոնական բաժին են տեղափոխել Երևան քաղաքի Աջափնյակ վարչական շրջանի բնակիչ, 45-ամյա Գևորգ Մանուկյանին և Մալաթիա-Սեբաստիա վարչական շրջանի բնակիչ, 32-ամյա Արսեն Կիրակոսյանին:
Ավելի վաղ տեղեկացրել էինք, որ ձերբակալվածները Ազգային ժողովի նախկին պատգամավոր, հայտնի գործարար Սամվել Ալեքսանյանի քրոջ որդին ու վերջինիս վարորդն են։
«Հայկական ժամանակ»-ի հետ զրույցում Քննչական կոմիտեից փոխանցեցին, որ կա նախաձեռնված քրեական վարույթ ՀՀ քրեական օրենսգրքի 335-րդ հոդվածի 2-րդ մասի հատկանիշներով: Երկու անձ ձերբակալվել է հանցանքի կատարման մեջ անմիջական ծագած կասկածի հիմքով։
Կատարվում է քննություն։
