«Մեզ ուկրաինիզացնելու պլանը, երկիրը երկրորդ մարտադաշտի վերածելու ծրագիրը, իհարկե, կրկին ձախողվել է մեր թշնամիների մոտ», – հայտարարել է Վրաստանի վարչապետ Իրակլի Ղարիբաշվիլին։
Վրաստանի կառավարությունն արդեն մի քանի ամիս է՝ ասում է, որ ծրագիր կա՝ երկիրը ներքաշել Ռուսաստանի հետ պատերազմի մեջ, որպեսզի երկիրը դառնա երկրորդ ճակատ։ Վրաստանի իշխանությունները մեղադրում են ուկրաինական իշխանություններին, վրացական արմատական ընդդիմությանը և «Արևմուտքի որոշ ուժերի»՝ այս պլանն իրականացնելու փորձի մեջ։
ԱՄՆ-ն ու ԵՄ-ն բազմիցս հայտարարել են, որ երբեք նման նպատակ չեն հետապնդել։ Կիևը բազմիցս հայտարարել է նաև, որ Վրաստանում պատերազմ չի ցանկանում։ Վրաստանի ընդդիմությունն, իր հերթին, պնդում է, որ «երկրորդ ճակատի» մասին հաղորդագրությունն իշխանություններն օգտագործում են բնակչությանը վախեցնելու և իշխանությունը պահպանելու նպատակով, և ուշադրություն է հրավիրում այն փաստի վրա, որ պատերազմի թեմայով իրենց ելույթներում Վրաստանի կառավարությունը փորձում է չքննադատել Ռուսաստանին։
