Վրաստանի նախկին նախագահ Միխեիլ Սաակաշվիլին «Politico» պարբերականին պատմել է, որ վրացական բանտում, որտեղ նա այժմ գտնվում է, առողջ և եռանդուն տղամարդուց վերածվել է 20 ախտորոշմամբ հիվանդի: Սաակաշվիլին գրում է, որ շուտով կմահանա, եթե բժշկական օգնություն չստանա երկրից դուրս: «The Insider»-ը ներկայացրել է միջազգային հանրությանն ուղղված նրա ուղերձից մի հատված:
«Երբ 8 տարվա աքսորից հետո 2021թ․ հոկտեմբերին վերադարձա Վրաստան՝ աջակցելու ազատ խորհրդարանական ընտրություններին, ես առողջ, եռանդուն 54-ամյա տղամարդ էի։ Այնուհետ անմիջապես ձերբակալվեցի վրացական իշխանությունների կողմից, և այդ ժամանակվանից գտնվում եմ կալանքի տակ՝ «իշխանության չարաշահման» մասին լուրերի և քաղաքական դրդապատճառներով մեղադրանքների հիման վրա, որոնք միայն Կրեմլը և Վրաստանի ներկայիս կառավարությունն են համարում օրինական:
Իսկ կալանավայրում առողջությունս կտրուկ վատացել է. ես հիմա մեռնում եմ։
Ես պարբերաբար խոշտանգումների եմ ենթարկվել՝ ֆիզիկապես և հոգեպես, ծանր մետաղներով թունավորման նշաններ կան: Այժմ ես տառապում եմ 20-ից ավելի լուրջ հիվանդությունից, որոնք բոլորն էլ զարգացել են կալանքի ժամանակ:
Ավելի ու ավելի ակնհայտ է դառնում, որ ես շուտով կմեռնեմ, եթե պատշաճ բժշկական օգնություն չստանամ երկրից դուրս:
Ես շարունակում եմ կոչ անել ԱՄՆ-ին և միջազգային հանրությանը՝ անել հնարավոր ամեն ինչ իմ կյանքը փրկելու համար՝ դիվանագիտական ճնշում գործադրելով Վրաստանի կառավարության վրա և տնտեսական պատժամիջոցներ սահմանելով Իվանիշվիլիի և նրա համախոհների դեմ։
Իմ մահը կարող է քաղաքական քաոս առաջացնել Վրաստանում, բայց իմ նահատակությունը, անշուշտ, կհամարվի Պուտինի հաղթանակը, հզոր խորհրդանիշ գուցե ամբողջ աշխարհի համար, որը կտեսնի, որ անհնար է դիմակայել ռուսական իմպերիալիզմին»:
Սաակաշվիլին նաև նշում է, որ Ուկրաինայում պատերազմի սկսվելուց հետո Վրաստանը «շարունակում է սահել Կրեմլի ուղղությամբ»․ «Վրաստանում ժողովրդավարական հետընթացը կրկին նշանավորվեց ԱՄՆ պետքարտուղարության մարդու իրավունքների մասին զեկույցի հրապարակմամբ, իսկ ժողովրդավարության գլոբալ սպառնալիքը ցուցադրվեց անցյալ ամիս Պուտինի և Չինաստանի նախագահ Սի Ցզինպինի հանդիպման ժամանակ:
Սակայն, միևնույն ժամանակ, Վրաստանի ժողովուրդը վերահաստատել է իր հավատարմությունը ժողովրդավարությանը և բռնապետության դեմ պայքարին՝ բողոքի ցույցեր իրականացնելով Թբիլիսիի կենտրոնում գտնվող խորհրդարանի շենքի դիմաց»,- գրել է Վրաստանի նախկին նախագահը։
