Շատ է ասվել, որ Երևանը նախևառաջ երևանցին է՝ իր յուրատեսակ աշխարհընկալմամբ, կենսափիլիսոփայությամբ ու կենցաղային մշակույթով։ Մեր քաղաքը չի կարող գույն ու դիմագիծ ունենալ, եթե ամենօրյա հոգսերի թնջուկում կորսվում է ամենակարևորը՝ երևանաբնակների մշակութային մակարդակը շարունակաբար բարձրացնելու, նրանց որակյալ մշակութային արտադրանք մատուցելու և ազգային մշակույթի հիմնասյուները պահպանելու առաքելությունը։ Այս մասին ֆեյսբուքյան իր էջում գրառում է արել Միացյալ Հայաստան կուսակցության հիմնադիր-նախագահ Երվանդ Թարվերդյանը:
«Որպես Երևանի հիմնախնդիրներին քաջատեղյակ հասարակական-քաղաքական գործիչ՝ այս ոլորտում երկու հիմնահարց եմ ուզում կարևորել։ Նախևառաջ, հրատապ է մշակութային արժեքներին հաղորդակցվելու մատչելիության ապահովումը բնակչության բոլոր խմբերի համար՝ առանց բացառության։
Երևանյան մշակութային օջախների և դրանցում կազմակերպվող միջոցառումների տոմսերի գները պիտի լինեն օպտիմալ և հասանելի միջինից ցածր սոցիալական խավերի քաղաքացիների համար։ Տոմսերի գնիջեցումից ենթադրյալ ֆինանսական վնասը կարող է փոխհատուցվել կա՛մ համայնքային բյուջեի, կա՛մ մասնավորի հետ գործակցության միջոցներով։ Օրինակ, հարկային արտոնություն կարող է տրամադրվել որևէ տնտեսվարողի քաղաքի այս կամ այն թատրոնը, թանգարանը կամ գրադարանը հիմնանորոգելու դեպքում։
Ի վերջո, շատ կարևոր է նաև Երևանի մշակութային հաստատությունների հիմնական և օժանդակ աշխատակիցների աշխատանքի արժանապատիվ պայմանների ապահովումը։ Նմանօրինակ հիմնախնդիրների դեռ կանդրադառնանք»,-գրել է նա` կցելով լուսանկար:
