Ադրբեջանի պաշտպանության և արտաքին գործերի նախարարությունները հայտարարություններ են տարածել, որում հավատարիմ մնալով ադրբեջանական գործելաոճին, հերթական անգամ Հայաստանին են մեղադրել՝ սահմանային իրավիճակը լարելու համար։ Մասնավորապես Ադրբեջանի պաշտպանության նախարարությունը հայտնել է, թե, իբր «Հայաստանի զինված ուժերը Տեղ գյուղի տարածքից ինտենսիվ կրակ են բացել Լաչինի շրջանում տեղակայված ադրբեջանական դիրքերի ուղղությամբ»։
Ադրբեջանի ՊՆ-ն հայտնել է, որ ադրբեջանական ուժերն այսպես կոչված «պատասխան և համարժեք գործողություններ են իրականացնում»։ Ադրբեջանի արտաքին գործերի նախարարությունը հայտնել է, թե, իբր «Հայաստանը շահագրգռված չէ խաղաղության գործընթացով»։
«Այն, որ Հայաստանի կողմից նման սադրանքները տեղի են ունենում միջազգային հանրության կողմից խաղաղության համաձայնագրի շուրջ բանակցությունների լուրջ կոչերի ֆոնին, ցույց է տալիս, որ Հայաստանը շահագրգռված չէ խաղաղ գործընթացով»,- ասվում է հաղորդագրության մեջ։ Բացի այդ Բաքուն պնդել է, որ «Հայաստանի կողմից նման ռազմական սադրանքներն ուղեկցվում են քաղաքական սադրիչ քայլերով ու հայտարարություններով»։
Ադրբեջանի ԱԳՆ-ն հայտնել է, որ «Հայաստանի քայլերը խախտում են ոչ միայն Ադրբեջանի տարածքային ամբողջականությունն ու ինքնիշխանությունը, այլև լրջորեն սպառնում են տարածաշրջանային խաղաղությանը և անվտանգությանը»։ Ադրբեջանական կողմը հայտնել է, որ «Հայաստանի այս գործողությունները պետք է լրջորեն մերժվեն և դատապարտվեն միջազգային հանրության կողմից»։
Ադրբեջանի ԱԳՆ-ն հերթական անգամ սադրանքի պատասխանատվությունը դրել է հայկական կողմի վրա՝ հավելելով, որ Ադրբեջանի զինված ուժերը ձեռնարկում և շարունակելու են ձեռնարկել բոլոր անհրաժեշտ միջոցները։
