«Ազգային ժողովի նախագահ Ալեն Սիմոնյանը լրագրող Անի Գևորգյանին տեղեկացրել է, որ չի պահանջում նրանից որևէ գումար»։ Այս մասին «Հայկական ժամանակ»-ի հետ զրույցում ասաց ԱԺ նախագահի խոսնակ Ծովինար Խաչատրյանը:
«Պարոն Սիմոնյանի համար բոլոր դատական հայցերում կարևորն իր արժանապատվության ու պատվի հարցն է։ Զրպարտությունն իր անձի նկատմամբ անընդունելի է»,- ասաց նա։
Ըստ խոսնակի՝ քանի որ այս հարցում շահարկվում է նաև Անի Գևորգյանի երեխայի հարցը, Սիմոնյանի համար այստեղ ամենից կարևորը նաև երեխայի լավագույն շահն է։
Նկատենք, սակայն, որ Անի Գևորգյանը երեկ Ալեն Սիմոնյանի լուսանկարներով պաստառ էր տեղադրել ԱԺ-ի մոտ և գումար էր հավաքում:
Հիշեցնենք՝ ավելի վաղ Սիմոնյանը տեղեկացրել էր, որ Երևան քաղաքի ընդհանուր իրավասության դատարանը բավարարել է դատական 3 ատյանով անցած պատվին և արժանապատվությանը վերաբերող իր հայցն ընդդեմ լրագրող Անի Գևորգյանի, երրորդ անձ՝ «Նյուզ Էյ Էմ» ՍՊ ընկերության։
Դատարանը պարտավորեցրել էր լրագրողին հրապարակային հերքել Սիմոնյանի հասցեին հնչեցրած զրպարտանքները և հօգուտ Սիմոնյանի բռնագանձել 150 հազար ՀՀ դրամ՝ որպես զրպարտության համար վնասի հատուցում, 100 հազար ՀՀ դրամ՝ որպես փաստաբանի խելամիտ վարձատրության գումար և 7000 ՀՀ դրամ՝ որպես հայցի բավարարված մասով նախապես վճարված պետական տուրքի գումար։
