Այսօր ԱԺ-ում Կառավարության հետ հարցուպատասխանի ժամանակ ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը վարչապետից հետաքրքրվեց՝ ասելով, որ կան հիմնավոր ապացույցներ Հայաստանում «5-րդ շարասյան» գոյության վերաբերյալ։
«Ձեր վերջին հարցազրույցի ընթացքում դուք խոսեցիք «5-րդ շարասյան» մասին, այնպես չէ, որ դուք հիմնավորեցիք, որ հիմնավոր ապացույցներ կան, բայց զգացողություն, որ դրա գոյությունը կա։ Այնպես չէ, որ հասարակության մեջ ու քաղաքական դաշտում դա միանգամից բերեց անհանգստությունների։ Բոլորն էլ զգում էին, որ ինչ-որ բան պատերազմի ընթացքում չի եղել հօգուտ մեզ, որովհետև գոյություն ունեն շարասյուներ։ Ձեր զգացողություններն ինչ-որ փաստերի վրա են հիմնվա՞ծ են, որովհետև երեկ էլ, երբ որ մեր սահմանային գոտում կրակոցները դեռ գնում էին, մեդիադաշտում հայտնվել էր ուրիշ համարի շարասյուն, որոնք մեր տեղաշարժերն էին ցույց տալիս»,- ասաց Քոչարյանը։
Վարչապետը, պատասխանելով հարցին, մեջբերեց մի դեպք, որտեղ բարձրաստիճան զինվորականը մեղադրվում է զինվորներին գրավված բարձրունքից իջեցնելու համար։
«Երկու օր առաջ ես հեռուստատեսությամբ մի ռեպորտաժ էի տեսել մի քրեական գործի մասին, որը ուղարկվել էր կամ պետք է ուղարկվի դատարան։ Ադրբեջանական կողմը գրոհել է և գրավել է բարձունք, հայկական կողմը հակագրոհել է և հետ է գրավել բարձունքը։ Քրեական գործով բարձրաստիճան զինվորականը մեղադրվում էր իր լիազորությունները չարաշահելու համար, հրամայել էր իջնել գրաված բարձունքից։ Սա չէ խնդիրը․ ամենամեծ խնդիրն այն է, որ ցանկացած գործողություն պետք է ունենա բացատրություն, պատճառաբանություն։ Չկա բացատրություն՝ ինչի է հանձնել հետ բարձունքը։ Իմ ունեցած տեղեկություններով՝ մենք էլի ունենք նման իրավիճակներ»,- ասաց վարչապետը։
Երկրի ղեկավարի կարծիքով՝ այստեղ մի տարբերակ կա․ գուցե նման զինվորականներն այլ երկրի գործակալներ են։
«Ինքս իմ մեջ իմ վերլուծական հետևությունն եմ անում ու ուզում եմ բացատրություն գտնեմ․ ինքը պետք է վերևից ստացած լինի հրաման, ես գիտեմ, որ նման հրաման չեմ տվել։ Ուրեմն ինքն ուրիշ տեղ ունի վերև, որտեղից ստացել է այդ հրամանն ու կատարել, որովհետև եթե ես տված լինեի, կասեր՝ ես զինվորական մարդ եմ, վարչապետը տվել է հրամանը, ես կատարել եմ։ Ենթադրում եմ՝ այլ տեղից է ստացել, որտեղից հրաման ստանալու փաստի դեպքում ավելի լուրջ մեղադրանք կստանար՝ լրտեսի կամ պետական դավաճանության։ Բայց ասում է՝ ես մեղավոր եմ, անփութություն է եղել, դատեք։ Իսկ երկրորդի դեպքում ոչ միայն կդատվի, այլ իր ապրած առոք-փառոք կյանքը կպարզվի՝ զրո է, որովհետև ինքը շարքային գործակալ է»,- հավելեց վարչապետը։
