ՀՀ վարչապետ Նիկոլ Փաշինյանն, անդրադառնալով Ադրբեջանում պահվող գերիների խնդրին, նշել է, թե պետական մարմինների ուշադրության կենտրոնում է այդ հարցը։ Հիշեցնենք՝ գերեվարվածների ծնողները երեկ փակել էին Գյումրի-Բավրա ճանապարհը՝ պահանջելով խնդրին լուծում տալ։
Նիկոլ Փաշինյանի խոսքով՝ այդ պրոբլեմը պետք է չլիներ, և եռակողմ հայտարարության մեջ այդ հարցը հասցեագրված է․ «Բաքուն բոլոր ատյաններում փորձում է ներկայացնել, իբր Ադրբեջանում գտվող քաղաքացիները ռազմագերի չեն, բայց դա ընդհանրապես մեկնաբանության հարց չի, որովհետև եռակողմ հայտարարության համապատասխան կետում խոսվում է ոչ միայն ռազմագերիների, այլև պատանդների և այլ պահվող անձանց մասին։ Սա այն դեպքն է, երբ Ադրբեջանը շատ ուղիղ չի կատարում միջազգայնորեն ստանձնած պարտավորությունները», – ասաց Փաշինյանը՝ նշելով, որ թե՛ խորհրդարանական, թե՛ կառավարական հարթակներում պետք է շարունակվեն հետևողական ջանքերը՝ խնդիրը րոպե առաջ լուծելու համար։
