Այն փաստը, որ երեք օր շարունակ ադրբեջանցի զինվորը կարողացել է, մարդու հավատ էլ չի գալիս, Սիսիանից հասնել մինչևԿապան, ինքնին արդեն արտառոց և խայտառակ դեպք է։ Այս մասին այսօր Ազգային ժողովում ճեպազրույցների ժամանակ ասաց «Հայաստան» խմբակցության պատգամավոր Գեղամ Մանուկյանը` անդրադառնալով ՀՀ տարածքում ադրբեջանցի զինծառայողների հայտնվելուն։
Անդրադառնալով Տեղ գյուղի մոտակայքում ապրիլի 11-ի ադրբեջանական հերթական ագրեսիային` Մանուկյանն ընդգծեց, որ այն չէր լինի, եթե մեկ տարվա ընթացքում, երբ հայտնի էր դարձել, որ Ստեփանակերտ տանող ճանապարհի փոփոխություն է լինելու Տեղ-Կոռնիձոր ուղիով, ամրաշինական և ինժեներական աշխատանքներ իրականացվեին սահմանին և տեղակայման ամբողջական համալիր ծրագիր իրականացվեր։
