ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը գրել է.
Վերջերս լրատվականներից մեկում «Թագուհի Թովմասյանի դեմ խումբ է գործում՝ Անդրանիկ Քոչարյանի գլխավորությամբ» վերնագրով մի նյութ է հրապարակվել:
Եթե այս տեքստից հանենք «Թագուհի Թովմասյան» բառերը և այն փոխարինենք օրինակ գերտերության մի ղեկավարի անունով, կստացվի շատ դիպուկ ինչ-որ մեծ օպերացիայի կազմակերպում՝ տեղեկատվական օպերացիա: Իհարկե մենք գիտենք, որ Թագուհի Թովմասյանն իր մասին մեծ կարծիք ունի, բայց էս ամենը մի քիչ չափազանց է: Իր մասին որևէ փակ ինֆորմացիա չկա: Տարիներ շարունակ իր գործունեությունը՝ ֆինանսական և այլն և այլն… ՝ թե որտեղից ինչ է ձեռք բերել և ում հետ ընկերություն անելու արդյունքում, ում հետ լավ հարաբերություններ պահելու արդյունքում, էդ ամենը որևէ ուժային կառույցից ճշտելու կարիք չկա. դրա մասին գիտի ողջ քաղաքը, ողջ հանրապետությունը: Էնպես որ ինքնակարևորության մոլուցքով տառապելու կարիք չկա:
Մենք հասկանում ենք, որ գուցե տիկին Թովմասյանը ուշադրության կարիք ունի և փորձում է լրատվականներին կեղծ լուրեր հաղորդելով հասնել ցանկալի արդյունքի, բայց կներեք, Տիկին Թովմասյան, այս պահին Դուք չեք տեղավորվում մեր օրակարգային հարցերում: Մեր օրակարգում համազգային նշանակության հարցեր են:
