Աջափնյակի կայարանը նախագծվում է «Մետրոգիպրոտրանս» ընկերության կողմից, որը երևանյան մետրոյի նախագծման ինստիտուտն է եղել խորհրդային ժամանակաշրջանում։ Փաստացի նախագծման աշխատանքն իրականացնում է այն ընկերությունը, որը խորհրդային տարիներին պատրաստել է մետրոյի ամբողջական նախագիծը։ Այս մասին այսօր Երևանի ավագանու նիստի ժամանակ հայտարարեց Երևանի փոխքաղաքապետ Տիգրան Ավինյանը։
«Ժամկետների մասով ասեմ, որ արդեն իսկ նախագծային աշխատանքների առաջին փուլն ընկերության կողմից հանձնված է, և մենք այս պահի դրությամբ զուգահեռ երկրորդ և երրորդ փուլերը միասին իրականացնում ենք և տարվա ավարտին ունենալու ենք Աջափնյակի մետրոյի կայարանի ամբողջական նախագիծը»,- ասաց Ավինյանը՝ հավելելով, որ զուգահեռ լինելու են նաև նախագծման մրցույթի դրված Սուրմալուի հարակից հատվածում գտնվող կայարանի նախագծման աշխատանքները»,- ասաց նա։
Անդրադառնալով հնարավոր մյուս կայարաններին՝ Տիգրան Ավինյանը նշեց, որ մետրոյի հետագա հնարավոր զարգացումը լինելու է դեպի Նազարբեկյան թաղամաս։
«Հաջորդ հնարավոր կայարանը լինելու է Նազարբեկյան թաղամասում։ Մետրոպոլիտենի զարգացման այս ծրագիրը մենք կառավարության հետ համատեղ դարձնելու ենք շարունակական։ Ամեն տարի մետրոպոլիտենի զարգացման ուղղությամբ իրականացվելու են աշխատանքներ, և մեր մետրոյի ցանցը տարեցտարի ընդլայնվելու է»,- նշեց նա։
