«Այս պահին բացառում եմ նրանց վերադարձը»:
Այս մասին այսօր ԱԺ-ում լրագրողների հետ զրույցում ասաց «Քաղաքացիական պայմանագիր» խմբակցության պատգամավոր Արմեն Խաչատրյանը՝ անդրադառնալով ադրբեջանցի երկու զինվորներին վերադարձնելու՝ Ալիևի պահանջի մասին:
Վերջինս նկատեց, որ եթե տեղի է ունեցել հանցագործություն, պետք է ամբողջությամբ քննել, պարզաբանել բոլոր հանգամանքները, նոր սկսել քաղաքական պրոցեսներ՝ բանակցություններ և այլն:
«Տեղի է ունեցել ենթադրյալ հանցագործություն, պետք է պարզվի և գնահատական տրվի, և այդ անձը պետք է ենթարկվի քրեական պատասխանատվության: Կարող եմ վստահեցնել, որ քննությունը դատախազության և քննչական մարմիններում չի ընդհատվելու՝ մինչև չպարզվեն դեպքի բոլոր հանգամանքները»,- նշեց նա:
Անդրադառնալով Ալիևի հայտարարությանը, թե Նիկոլ Փաշինյանը պետք է հայտարարի, որ Ղարաբաղը Ադրբեջան է, վերջինս ասաց, որ ամեն անգամ դժկամությամբ է մեկնաբանում Ալիևի սանձարձակ պահվածքը և հայտարարությունները:
«Եվ դա հասկանալի է՝ հաղթանակի էյֆորիայի մեջ է, բայց Ալիևը չէ, որ պետք է թելադրի, թե ինչ անենք և ոնց անենք: Ալիևը պետք է հասկանա, որ ուժով և բռնությամբ որևէ հարց չի կարող լուծել: Պետք է հասկանա նաև, որ հատկապես իր բռնապետական ռեժիմի պայմաններում նման հայտարարությունները ի վնաս իրեն են լինելու, և այդ ատելության մթնոլորտը, որ գեներացրել է իր ժողովրդի մոտ, մի օր իր իշխանության դեմ է ուղղվելու. բոլոր բռնապետների վերջն այդպիսին է»:
