Ռուսաստանի Դաշնության Արտաքին գործերի նախարար Սերգեյ Լավրովը մի շարք արտգործնախարարների հրավիրել է մասնակցելու Միավորված ազգերի կազմակերպության՝ ապրիլի 24-25-ը կայանալիք Անվտանգության խորհրդի նախարարական նիստերին։ Հրավիրյալների թվում է նաև ԱՄՆ պետքարտուղարության ղեկավար Էնթոնի Բլինքենը։ Այս մասին լրագրողներին ասել է Ռուսաստանի ԱԳ փոխնախարար Ալեքսանդր Պանկինը, այս մասին գրել է ՏԱՍՍ գործակալությունը:
«Ես չգիտեմ՝ դա կլինի՞: Ես գիտեմ, որ նախարարը հրավիրել է արտաքին քաղաքական գերատեսչությունների ղեկավարներին, պետքարտուղարությանը և այլոց՝ մասնակցելու հանդիպումներին, որոնք նա կգլխավորի»,- ասել է Պանկինը։
«Ես չգիտեմ՝ ինչպիսին է պատասխանը եղել, ով կգա, ով չի գա: Եթե պետքարտուղարը գա, չգիտեմ՝ շփում կլինի՞ »,- հավելել է Լավրովի տեղակալը:
Նրա խոսքով՝ Լավրովի և Բլինքենի վերջին շփումը Հնդկաստանում՝ G20-ի նախարարների հանդիպման շրջանակում, դրվագային է եղել ու նախապես ծրագրված չի եղել։
Ապրիլի 1-ից Ռուսաստանը նախագահելու է ՄԱԿ-ի Անվտանգության խորհուրդը՝ փոխարինելով Մոզամբիկին: Նախագահության պաշտոնը երկրին է անցել մեկ ամսով
