Ուկրաինայի մի շարք առանցքային դաշնակիցներ, այդ թվում՝ ԱՄՆ-ն, դիտարկում են Ռուսաստան արտահանման գրեթե ամբողջական արգելք սահմանելու հնարավորությունը. գրում է Bloomberg-ը: G7-ի երկրների պաշտոնյաներն այդ գաղափարը քննարկում են Ճապոնիայում մայիսին կայանալիք G7-ի առաջնորդների գագաթաժողովի նախաշեմին: Ենթադրվում է, որ արդյունքում նմանատիպ արգելող միջոցներ կկիրառեն նաև ԵՄ անդամ պետությունները։ «Առաջարկը դեռ քննարկվում է և կարող է փոխվել», – նշում Է Bloomberg-ը:
Նման մոտեցումը կարող է ամբողջությամբ փոխել պատժամիջոցների գործող ռեժիմը՝ արգելելով որևէ բան վաճառել Ռուսաստանին, բացառությամբ թույլատրված ապրանքների փոքր ցանկի: Ներկայիս կանոններով՝ Մոսկվայի դեմ սահմանված պատժամիջոցների ռեժիմը գործում է ճիշտ հակառակ ձևով – ցանկացած արտահանում լռելյայն թույլատրվում է, իսկ սահմանափակումները գործում են միայն առանձին դեպքերում։
