Ավելի ճիշտ կլինի դասեր քաղեք Դաշնակցությունից, ոչ թե դասեր տաք։ Այս մասին այսօր ԱԺ արտահերթ նիստին ժամանակ ասաց ՀՅԴ ԳՄ անդամ, «Հայաստան» դաշինքի պատգամավոր Արմեն Ռուստամյանը։
«Մինչև ելույթին անցնելը ես ուզում եմ կարճ խոսքով դիմել նորաթուխ նժդեհականներին և բոլոր նրանց, ովքեր փորձում են անընդհատ դասեր տալ Դաշնակցությանը։ Դուք նկատի ունեցեք, որ խոսքը 133-ամյա կենսագրություն ունեցող և կենսունակ կուսակցության մասին է, ավելի ճիշտ կլինի դասեր քաղեք, ոչ թե դասեր տաք, որովհետև կնմանվեք այն երեխաներին, ովքեր փորձում են սովորեցնել իրենց հորը, թե ինչպես պետք է երեխաներ ունենալ», – ասաց պատգամավորը։
Ռուստամյանի այս հայտարարությանն ի պատասխան իշխանական պատգամավոր Մաթևոս Ասատրանն իր ելույթում նշեց, որ կցանկանար՝ ընդդիմադիրները 130 տարվա կատարողական ներկայացնեին։
«Մենք ներկայացնում ենք մի տարվա, դուք ներկայացնեիք 130 տարվա։ Պարո՛ն Ռուստամյան, Թիֆլիսում նստած Հայաստանի ճակատագիրն էիք որոշում՝ չիմանալով, թե ինչ էր կատարվում այստեղ։ Այստեղ էր որոշվում, այստեղի կռվի արդյունքում էր որոշվում, ոչ թե այնտեղ նստած», – ասաց Ասատրյանը։
Անդրադառնալով Լեռնային Ղարաբաղի հիմնահարցին՝ Ասատրյանը նշեց, որ նախկինում առնվազն 20 տարի ՀՀ-ն եղել է շահեկան դիրքում, սակայն չի լուծել արցախյան հարցը․
«Ես ձեզ հարց եմ տալիս՝ ինչո՞ւ չորոշեցիք Արցախի ճակատագիրը, ինչո՞ւ թողեցիք մեր ու մեր երեխաների վզին, հիմա ո՞ւմ վզին եք ուզում թողնել, ի՞նչ եք առաջարկում մեզ։ Մենք խոսում ենք ընդհանուր հայրենիքի մասին, որը ժառանգություն ենք ստացել ձեզնից, պարոն Ռուստամյան, որովհետև դուք միշտ մաս եք կազմել»
