«Ընդդիմադիր հովեկների խմբակցություն է։ Գալիս են հյուրախաղերով զբոսանքների, հետո գնում են», – դիմելով ելույթից հետո ԱԺ դահլիճը լքած «Պատիվ ունեմ» խմբակցության պատգամավորներին՝ ասաց ՔՊ խմբակցության ղեկավար Հայկ Կոնջորյանը։ Նրա խոսքով՝ Սերժ Սարգսյանի մասին դիֆերամբներ են ձոնում. «Խնկարկում են Սերժ Սարգսյանի նախագահությունն այս ամբիոնից։ Մի մատուռ սարքեք ձեր կողքը, քառօրյային կարող եք գալ, խունկ ծխեցնել, վերհիշել Սերժ Սարգսյանի նախագահությունը։ Մեծ բանակցող․․․ Չէ մի՝ Թալեյրանը։ Թալեյրանի ժամանակվա բանակցային ժառանգությունն են մեզ փոխանցել, մենք էլ տարել, էդ ժառանգությունը քամուն ե՞նք տվել»։
ՔՊ պատգամավորի մատուցմամբ՝ ըստ նախկին իշխանությունների՝ Հայաստանը 20 տարի շարունակ ունեցել է տարածաշրջանի ամենամարտունակ բանակը և վարել ամենահմուտ դիվանագիտությունը. «Լավ, եկեք պատկերացնենք, որ այդպես է, այդ դեպքում ինչո՞ւ չեք լուծել Արցախի հարցը։ Որ լսում եմ ձեզ՝ մեկը Թալեյրանն է եղել, մյուսն էլ մեծ զորավար Հանիբալը։ Բա Հանիբալի ու Թալեյրանի 20-ամյա կառավարման ժամանակ ունենալով ամենաուժեղ բանակն ու ամենահմուտ բանակցությունը՝ լուծեիք»։
