Կան առաջարկներ, որոնք ընդունելի են և վերաբերում են շահերի բախման բացառմանը. Տիգրանյան

«Թրանսփարենսի Ինթերնեշնլ հակակոռուպցիոն կենտրոն» հասարակական կազմակերպությունը «Արժանապատիվ աշխատանք հիմա» ծրագրի շրջանակում իրականացրել է ՀՀ առողջապահական և աշխատանքի տեսչական մարմնի (ԱԱՏՄ) աշխատանքային իրավունքի, ներառյալ աշխատողների առողջության պահպանման և անվտանգության ապահովման ոլորտում օրենքով սահմանված պետական վերահսկողության լիազորությունների, այդ թվում` օրենսդրության կիրարկման մոնիտորինգ:

Դրա վերաբերյալ զեկույցն ապրիլի 26-ին ներկայացվել է ԱԺ աշխատանքի և սոցիալական հարցերի մշտական հանձնաժողովին: Ծրագրի փորձագետ Արմեն Խուդավերդյանն անդրադարձել է զեկույցում ներառված առաջարկություններին, դրանց իրացման հնարավորություններին: Զեկուցողը տեղեկացրել է, որ մասնավորապես, առաջարկվել է տեսչական մարմինների տեսուչների բարեվարքությունը բարելավելու նպատակով անցկացնել վերապատրաստման դասընթացներ:

Հանձնաժողովի նախագահ Հերիքնազ Տիգրանյանը, կարևորելով մոնիտորինգի արդյունքները, նշել է, որ զեկույցում ի հայտ են եկել բոլոր Տեսչական մարմիններին առնչվող խնդիրներ:

Նա նպատակահարմար է համարել  կազմակերպել քննարկում` Աշխատանքի և սոցիալական նախարարության, տեսչական մարմինների  աշխատանքը համակարգող գրասենյակի և տեսչական մարմինների ներկայացուցիչների մասնակցությամբ:

Ըստ Հերիքնազ Տիգրանյանի` կան առաջարկներ, որոնք ընդունելի են և վերաբերում են շահերի բախման բացառմանը, տնտեսվարողների մոտ ստուգումների կազմակերպման ժամանակացույցի հստակեցմանը: Որոշ առաջարկների մասով էլ լրացուցիչ քննարկումների անհրաժեշտություն կա:

Կարևորելով քննարկումը` հանձնաժողովի նախագահը նշել է, որ նման զեկույցները հնարավորություն են տալիս օրենսդրական փոփոխությունների միջոցով կարգավորել առաջացած խնդիրները: