Թուրքիայի արտաքին գործերի նախարար Մևլութ Չավուշօղլուն թվիթերյան գրառում է կատարել՝ «Թուրքիան ռուս-ուկրաինական պատերազմում խաղաղության հույսն է» խորագրով։
Այս մասին տեղեկացնում է թուրքական պետական Անադոլու լրատվական գործակալությունը։ Չավուշօղլուն շեշտել է, որ ՄԱԿ-ի աջակցությամբ իրենց հաջողվել է իրականացնել Ստամբուլի հացահատիկային համաձայնագիրը և կանխել համաշխարհային պարենային ճգնաժամը։
Թուրք պաշտոնյան միևնույն ժամանակ հայտնել է, որ Ուկրաինայում պատերազմի մեկնարկից ի վեր Թուրքիան Անթալիայում կայացած դիվանագիտական ֆորումի շրջանակներում կազմակերպել է Ռուսաստանի և Ուկրաինայի ներկայացուցիչների առաջին հանդիպումը։ Նա հիշեցրել է, որ Թուրքիան՝ նախագահ Ռեջեփ Թայիփ Էրդողանի հովանու ներքո Ստամբուլում ընդունել է Ռուսաստանի Դաշնության և Ուկրաինայի պատվիրակություններին։ Բացի այդ Թուրքիայի արտաքին քաղաքական գերատեսչության ղեկավարը նշել է, որ Անկարան ապահովել է Ուկրաինայի և Ռուսաստանի միջև գերիների փոխանակման կայացումը և նպաստել Ռուսաստանի ատոմային էներգիայի պետական գործակալության (Ռոսատոմ) և Ատոմային էներգիայի միջազգային գործակալության (ՄԱԳԱՏԷ) միջև շփումներին։ Չավուշօղլուն հավելել է, որ Թուրքիան ուշադիր հետևում է Մոնտրոյի կոնվենցիան։
